Nagpadayon ang Phase 2 Training sa mga Barangay Extension Workers (BEWs) sa tulo ka nagkalain-laing venues karong adlawa bahin sa Vegetable Production.

Dungan ang training ug naay managsamang topiko ang tulo ka mga venues. Ang usa ka grupo nahimutang sa Provincial Engineering Office Conference Hall, ang ikaduha sa Provincial Veterenary's Office Training Hall, ug ang ikatulo, sa Provincial Agriculturist's OfficeTraining Hall. Gituyo ‘ni aron matuman ang social distancing.

Wala sila midiretso sa pagtuki mahitungod sa ensaktong pag-atiman sa tanum kondili gisugdan pinaagi sa pagkat-on sa Non-Formal Education ug Facilitating Skills. Isa sa mga facilitators, si Dr. Rowina Esconde, nagpatin-aw sa kaimportante sa maong topiko.

"Kinahanglan kaayo nila ang Non-Formal Education aron mamahimo silang hanas inig abot nila sa barangay unsaon nila pag-approach ang komunidad, unsaon nila pagdala ang mga tao diha sa komunidad nga diin ang matag usa mopartisipar gayud kay aron sila mahimong successful diha sa pagpadagan sa programa nato, ang KAAGAPAY program ni Kuya Gob."

Dynamic ang ilang training tungod kay nagkalain-laing mga activities ang ilang gihimo aron gawas sa mahimong lingaw ang training, mas masabtan ang ilang papel isip BEWs ug mahimo silang mas epektibo nga facilitator taliwala sa nagkadaiyang personalidad nga ilang mahibalag sa mga barangay.

Kahinumdoman nga mibisita ang mga BEWs sa mga barangay niaging semana aron sa pagpanghatag sa mga forms nga maoy basehan sa Technical Working Group sa pag-identify sa mga qualified beneficiaries nga padayonon karong semanaha tungod kay daghan pang interasado ang wala nahatagan. Matud pa ni Pastor Edzel Silanga, usa ka BEW nga na-assign sa B.E. Dujali, nga minimum 20 ka beneficiaries ang makadawat ug mga libreng seedlings ug upat (4) ka beneficiaries ang pilion nga makadawat ug piso matag barangay. Modagan pa’g semana una mahuman ang final list sa mga beneficiaries. Magsugod ang pagpanghatag sa piso sunod tuig inig igo na ang gidaghanon sa mga piso gikan sa Multiplier Farm sa Salawaw, Sto. Niño, Talaingod.

"Good news sir kay ang mga tao ug ang atong mga local executives nga mga barangay captains willing pud kaayo nga mo-kooperar, mo-participate sa programa nga KAAGAPAY sa atoang pinalanggang Gobernador Edwin Jubajib," dugang niya.

Lakip sa ilang tun-an karong adlawa ang Pagtanum ug Kape, samtang ang Marketing and Value Adding of Vegetables, Soil and Nutrient Management, Pag-ila ug Pagpakgang sa mga Peste ug mga Sakit sa mga Gulay, Organic Agriculture ug ang Harvest Best Practices sa sunod nga mga adlaw nga matapos karong Huwebes.

 

 

 

 

 

DavNor News