Laing apektadong sektor ang gihatagan ug ayuda sa probinsiyal nga panggamhanan taliwala ni’ng krisis sa covid-19. Atol sa selebrasyon sa ika-42 nga kasumaran sa National Disability Prevention and Rehabilitation Week niining semanaha, July 13 to 17, 2020, gibisita ni Kuya Gob ang mga Local Government Units pag-usab aron ipang-apud-apod ang tag-lima ka kilong bugas ug tag-lima ka de latang sardinas ngadto sa mga Persons with Disabilities (PWDs) ug laing tag-tulo ka kilong bugas ug mga medisina sa hi-blood ug diabetes alang sa mga Senior Citizens.

Base sa listahan sa Provincial Social Welfare and Development Office, 10, 762 nga mga PWDs ug 14, 099 ka mga Senior Citizens ang nahatagan sa mga lungsod sa tibuok Distrito 1 sa Davao del Norte. Duna poy gipanghatag nga mga tabang-aparato sa ubang mga benepisyaryo sama sa 5 ka wheelchair pambata, 3 ka wheelchair pandagko, 2 ka walker pandagko, 2 ka quadcane, ug usa ka pares nga saklay.

Sumala pa ni Engr. Darlito S. Palermo, Regional Council for National Anti-Poverty Commission President ug Overall President sa Tagum City PWD Federation nga lisud kaayo ang kahimtang sa sektor sa mga dunay kapansanan ug siya nanghinaut sa padayong suporta sa atong gobyerno.

“Kanang mga programa sa atong gobyerno pareha anang mga TUPAD program, other programs, matagaa’g special allocation atong mga Persons with Disability para aduna sila’y sustainable nga mahatag sa ilang pamilya para sa ilang adlaw-adlaw nga panginahanglan.”

Way puas gihapon ang pagpahinumdom sa gobernador nga di lang sa maglaag-laag karong higayona labi na ang sektor sa PWDs ug Senior Citizens. Bisan sa panimalay, mahimong produktibo pinaagi sa pagpananum ug pamuhi’g kahayopan nga suportado ni Kuya Gob ilalom sa Food Sufficiency program, ang KAAGAPAY (KAwsa sa AGrikulturA ug PAnginabuhian sa BarangaY).

“Mao lang gyud ni akoang hangyo sa inyoha, ang inyong kooperasyon. Kami ni mayor grabe gyud among problema. Halos kada bulan kapila mi mag-meeting para ang among direksyon mahisentro gyud sa matag usa ka pamilya. Mahimo nga epektibo ang atong ordinansa ug ang atong mga balaodnon nga himoon sa atong munisipyo ug sa probinsiya. Kay di man mi mosugot nga masakit mo. Mao na among giingon nga magsabot mi sa among monthly meeting, urgent meeting nga among pagahimoon, unsa gyuy pinaka-the-best nga among mahimo para maprotektahan ang katawhan.”

Magpadayon ang food relief and medical supplies distribution sa probinsiya ngadto sa Distrito 2 ug sa Island Garden City of Samal niing semanaha.