Nagsugod na’g pangitlog ang unang batch sa miabot nga mga genetically potential nga manok sa DavNor Multiplier Farm nga nahimutang sa Sitio Salawaw, Bgry. Sto. Niño, Talaingod.

Duha ka klaseng breeds ang gipasanay sa maong umahan; ang mga bayi, Barred Plymouth Rock nga nitib sa America ug ang mga laki, Australorp nga nitib usab sa Australia. Nailhang paspas managko ug lamian ang karne niining klaseha sa manok.

Matud pa mikabat 8.5 milyones ka pesos ang pondo gikan sa nasyonal ang gigahin alang sa Livestock and Poultry Restocking Project diin ang 20 ka ektaryang Multiplier Farm nahimong kabahin niini. Kompleto ang mga ekipo: gikan sa air-conditioned pool room, industrial incubator, hatchery machine nga mibalor 430 mil pesos, laing brooder house ug range area.

Sa gilaumang 700 ka bayi ug 140 ka laki nga foundation stock, unang miabot ang katunga sa unang order nga 350 ka bayi ug 70 ka laki duha ka semana ang milabay ug ang laing katunga moabot karong semanaha.

“Sa karon, operational na ta kay naa na man ang atong mga manok. Ang pirmerong nag-abot nga batch is 177 ka babae ug 36 ka lalaki. Sa karon, naga-itlog na sila hopefully karong Martes, mag-set na mi sa encubator. 21 days gikan karong Martes next week, naa na tay makita nga mga piso, mga chicks. I-brood nato na sila for 21 days which is ready na pud sila nga ibutang sa grow out nga building… By September makakita na ta’g produkto… Kay nagsugod pa man ‘ta, hinay-hinay nga modaghan atong mga produkto’ng manok nga naa sa atong likod karon,” pagsaysay ni Dr. Shirley B. Sanico, Provincial Veterinary’s Office, Senior Agriculturist, Project Leader sa Multiplier Farm.

Dugang ni Dr. Sanico nga dali ra ang pagbuhi nila tungod kay mokaon kini’g sagbot nga makit-an sa gawas, mao ng dili kaayo gasto sa commercial feeds (90g kada manok kada adlaw). Pareho ra ang batasan niini sa atong bisaya nga manok ugaling lang dili kabalo molumlom.

Ginapangandaman na ang pag-abot sa ikaduhang batch sa unang order hinungdan sa pagpatukod sa mga kulungan sa ubos nga bahin sa gawas sa pasilidad. Siyam (9) pa ka mga poultry houses (rooms) ang idugang aron ma-accommodate ang 840 chicken heads. Sa maong gidaghanon, gibana-banang 9,000 - 10,000 ka piso ang maharvest kada bulan nga igo ipanghatag sa tanang beneficiaries sa tibuok probinsiya nga magsugod karong Enero sunod tuig.

“Kaya siya kaayo kay ang atong projection dinhi, kung makompleto ang atong manok nga 700 ka babae, makaproduce ta’g naa sa mga 9,000 - 10,000 chicks per month,” pasalig ni Dr. Sanico.

Kauban sa among pagbisita ang grupo sa mga Barangay Extension Workers (BEWs) nga nagpakita’g kahinam nga makakat-on sa pag-atiman sa mga manok. Kabahin kini sa ilang Phase 2 sa technical skills training aron maandam sa ilang pagdeploy puhon sa mga barangay.