DAVAO DEL NORTE – Taliwala sa makalilisang nga COVID-19, ang probinsyal nga panggamhanan sa Davao del Norte, ubos sa liderato ni Kuya Gov. Edwin I. Jubahib, nagapadayon sa pag giya sa mga katawhan aron makalikay sa maong pandemya. Bisan pa, giatiman og miarangkada na usab ang pagtagad sa panginabuhian ning probinsya, hilabina katong nahilakip sa sektor nga “the least, the last & the lost”.
Usa niini mao ang pagbansay sa mga PWDs (Persons with Disability) sa Magupising, Braulio E. Dujali kung diin 17 ka mga partisipante mingtambong sa lima (5) ka adlaw nga pagbansay sa Paghabi og Lanot sa Saging aron mamahimo’ng tela (Banana Fiber Weaving cum Fabric Production) niadtong Hulyo 21-24, 2020. Isa lamang kini sa mga production sites sa maong proyekto nga nahimutang sa Munisipyo sa Braulio E. Dujali. Aduna na’y nagahulat nga mopalit sa ilang training output. Ang mao’ng pagbansay gipatigayon pinaagi sa PADO-EWDD (Employment & Workforce Development Division) ubos sa pakipag-alayon sa Public Employment Service Office (PESO) sa Munisipyo sa Braulio E. Dujali.
Isip pagsuporta sa mapadayunong paghimo og by-products sa maong tela gikan sa saging, usa ka pagbansay, isip parte sa Product Development niini, ang paghimo og nagkadaiyang stylish bags ang gipatigayon sa Department of Trade and Industry(DTI)-Davao del Norte Office niadtong Hulyo 21-25, 2020 nga gitambongan sa 9 ka mga partisipante nga taga Tagum. Ang pagpatigayon sa maong pagbansay giatol sa pagsaulog sa paghuman sa 2020 National MSME Week Celebration. Ang mga gibansay sigurado na nga makatrabaho isip mananahi ilalom sa The Musa Fabric by Modishchey Couture nga gipanagiyahan ni Ms. Joy Soo, usa ka home-grown fashion designer og Musa advocate.
Sa lain’g bahin, 23 ka Former Rebels (FRs) ang mitambong sa gipatigayon nga pagbansay sa Mushroom Production & Processing, Meat Processing og Fruits & Vegetable Processing niadtong Hulyo 22, 2020 sa Freedom Residences, Cuambogan, Tagum City nga gipanguluhan sa Technical Education & Skills Development Authority (TESDA)-Davao del Norte Field Office. Ang maong okasyon gitiklop pinaagi sa pagbsita ni Sec. Isidro S. Lapena, Director General sa TESDA, Kuya Gov. Edwin I. Jubahib, Mayor Allan A. Rellon, nga girepresentahan ni Ms. Rogeneth P. Llanos (Tagum City CTEC) og uban pang mga miyembro sa Poverty Reduction Livelihood and Employment Cluster kauban ang 71st Infantry (Kaibigan) Battalion, Philippine National Police, Task Force Tagum City, Department of Trade and Industry, Department of Agricluture, Cooperative Development Authority, Provincial Government of Davao del Norte, pinaagi sa Provincial Social Welfare and Development Office (PSWDO), Department of the Interior & Local Government (DILG) og ang Department of Labor & Employment (DOLE). Gipamulong ni Kuya Gov. Edwin Jubahib nga mosuporta ang probinsyal nga panggamhanan pinaagi sa pagpamaligya sa mga mamahimong produkto sa mga FRs.
Pipila lamang kini nga mga pamaagi sa panggamhanang probinsyal sa Davao del Norte, kuyog ang mga partner- stakeholders niini, aron matagaan ang mga Dabaonon og panginabuhian bisan pa sa kasamatangan’ng giatubang nga COVID-19 pandemya ubos sa pagpatuman usab sa gimando nga minimum health safety and protocols.
