MANGUNA ang probinsyal nga kagamhanan sa Davao del Norte sa pagtuman sa balaod alang sa mga tawo nga adunay kapansanan o mga Persons With Disabilities kun PWDs.
Sa pagtapos sa ika-38 nga kasaulogan alang sa mga PWDs nga may tema, “Karapatan Ng May Kapansanan, Isakatuparan. .. Now Na! gipasabot ni Provincial Administrator Samson Sanchez nga sukad pa sa miaging administrasyon naningkamot na ang probinsya nga maoy unang motuman sa maong balaod. Bisan pa kung daan na ang maong bilding himoan gayod kini ug paagi aron makasunod sa maong balaod.
“Dire sa atong probinsya, sulod sa milabay’ng administrasyon ni Gobernador del Rosario gipaningkamotan gayod nga ang tanang buhatan sa panggamhanan probinsyal duna na gyoy ramp. Dili gina-approved ang architectural design kung walay rampa. Ug ang atong kapitolyo hapit na mag-operate ang elevator para niini sa pagtuman nianang maong balaod,” matod sa bag-ong provincial administrator nga nagpasabot sa main building nga gihimoan ug ”lift” alang sa mga PWDs o differently-abled-person.
Ubos sa Batas Pambansa 344 nga gitawag usab ug “Accessibility Law” niadtong 1982 ug karon apil na sa Republic Act No. 7277 kun Magna Carta for Disabled Persons, sulod sa Chapter 6 Section 25, ang maong balaod nag-awhag sa tanang establisamento nga tumanon ang Barrier Free establishment pinaagi sa pagbutang ug rampa kun ang bilding usa lang ka andana; magbutang kini ug lift o elevator kun dunay ikaduha, ikatulo o sobra pa nga mga andana.
“Angay kini nga ipatuman sa tanan sa lalawigan sa Davao del Norte. Ang uban nga establisamento dapat mag-obserbar niini Batas Pambansa 344, Accessibility Law nga tagaan kahigayonan ang atong mga differently-abled person labi na tong mga naga wheelchair ug naga crutches nga sayon sila mosulod sa ilahang mga buhatan,” padayong pasabot ni administrator Sanchez.
Gawas sa kapitolyo, nanawagan usab ang bag-ong administrador nga tumanon kini sa tanang LGUs sa probinsya.
“Ug hinaut unta ang tanang mga LGUs pod karon labina sa administrasyon ni Governor Anthony del Rosario mapatuman gyod kini para makab-ot ang tumong ug tinguha nga Barrier Free establishment sa tibuok lalawigan sa Davao del Norte. Ang mga old buildings butangan kini ug mga rampa in coordination with their city building officials sa mga architect ug sa tanang mga local officials aron matuman gyod kini nga balodnon,” panawagan niya.
Atol sa pagtapos sa ika-38 nga kasaulogan, gilusad ang Search for Barrier Free Establishment sa tibuok probinsya diha sa mga publiko ug pribadong tunghaan, hospitals, restaurants, shopping malls, mga dapit kalingawan (recreational places), simbahan ug mga bangko. (pioDavNor)
