LAING UPAT “bahaw” nga mga proyekto ang gikumpleto sa administrasyon ni Gobernador “Kuya Gob” Edwin Jubahib ug gi-inagurahan Huwebes, Agosto 6.

Ang P55.5 milyones 13.69 kilometros Road Rehab/Improvement sa Purok 3 ug ang P2.5 milyones Processing and Bagsakan Center sa barangay Palma Gil, P58 milyones 2.5 kilometros Road upgrading Dagohoy-Daligdigan Provincial Road sa barangay Dagohoy, tanan sa lungsod saTalaingod, ingon man ang P20 milyones 840 metros Road upgrading/concreting sa San Vicente-Butay Provincial Road sa Asuncion tanan na-turnover na ngadto sa lokal nga mga LGUs.

“Akong pagyukbo sa atong kugihan, maabtikon nga Gobernador Kuya Gob Edwin Jubahib. Kung wala pa siya, kadtong mga bahaw namo nga projects sa CMGP, PAMANA, di gyod to mahuman. Nilingkod siya’g July 2019, naa lang siya’y July to December (2019) to complete the project. Sobra lima ka project sa DILG nga na-bahaw, pito man seguro. Kung wala ang atoang Gobernador, kung wala nila tulgi ang matag projects hangtod mahuman, di ni gyod mahuman sa December 2019. Palakpakan nato ang Provincial Engineering Office,” pagdayeg ni DILG Provincial Director sa Davao del Norte Abito Bernasor.

Ang ubang wa-matiwas nga proyekto gisugdan pag-implementar niadtong 2015 pa.

“Mga igsoon, kaning karsadaha mao ni ang projects sa previous administration nga wala nila nahuman. Kasagaran kung inyong nabantayan, mga projects gani sa milabay nga administrasyon di man tiwason kay hunahuna project na sa ilang kontra sa politika. Pero sa atoang panahon karon isip inyong Governor sa Davao del Norte, tanan nga mga proyekto nga bahaw, di na bahaw pan-os na ni kay naay uban 2015, 2016, 2017, 2018 ni nga mga project, pero atong gipaningkamotan nga mahuman ning tanan para inyong opisyal nga magamit, para usab makakuha pa ta ug ubang proyekto nga gisalig sa atoa gikan sa nasyonal government,” pasabot ni Kuya Gob ngadto sa mga residente sa Dagohoy, Talaingod ug San Vicente, Asuncion.

Sukad sa miaging bulan Hulyo miabot na ug 12 wa-matiwas nga proyekto ang gikumpleto sa administrasyon ni Kuya Gob ug na-turnover ngadto sa mga LGUs nga naglakip sa mga farm-to-market roads, water systems ug ubang proyekto nga gipondohan sa PAMANA, OPAPP ug CMGP.

“Tungod kay naa na ang karsada, mosunod na pod ang development. Ang beneficiary, ang katawhan gyod sa maong barangay,” dugang pasiugda ni Kuya Gob nga naghisgot sa pagtaas sa presyo sa yuta sa maong lugar gawas pa sa pag-ubos sa gastos sa pagdala sa mga produkto sa uma.

Nanawagan sab si Kuya Gob nga angayan lamang nga bantayan ug ampingan gyod sa katawhan ang maong imprastruktura.

 

 

 

DavNor News