SAMA sa unang batch sa Revitalized--Pulis Sa Barangay (RPSB) gisaad ni Gobernador Kuya Gob Edwin Jubahib ang iyang todo-suporta aron lang gyod mahatod ug mapadayon ang pagtabang sa mga Ata-Manobo Indigenous People didto sa Sitio Naputkalan, Nasilaban ug Lumabag sa Talaingod atol sa pormal nga programa Lunes, Agosto 10.
”Unang-una ani ang ilahang food supply, then ang ilahang mga requests nga mga materials, construction supplies, livelihood programs aron ilang makita nga ang programa sa RPSB ug provincial government is seryoso para sa pagtabang sa ilaha,” pahayag ni Kuya Gob atol sa interbyu.
Kahinumduman nga niadtong Marso 5, sila si Kuya Gob ug Congressman Pantaleon Alvarez ang nag-pagikan sa unang 51 ka mga RPSB aron ma-deploy sa lain-laing sitios sa Talaingod sa misyon nga ma-preserbar ug mapadayon ang na-“cleared” na sa Army nga mga lugar gikan sa impluwensya sa NPAs. Tumong sab niini nga mapugngan ang pagbalik sa mga rebelde ug mapanalipdan ang wala ma-impluwensyahi nga mga lugar nga magtudlo sab sa komunidad ug panginabuhian.
“Human sa lima ka bulan, daghan na kaayo sila’g nahimo nga Peoples Organization ug amoa i-maintain ang mga programa,” matod ni RPSB 2nd batch Team Leader Police Lieutenant Roland Rubion nga nagtug-an nga nagplano na sila ug dugang programa alang sa mga IPs.
Ang unang team nga na-asayn sa Sitio Nasilaban ilawom sa pagpanguna ni Team Leader Police Lieutenant Annabelle Dacudao malampuson nga nakaporma ug Nasilaban Tatag Farmers Association sa Cardava farming ug ubang livelihood programs sama sa Women’s Handicraft ug Single Motor Drivers Association sa mga IPs.
Bisan kung “sayon” ang pagsulod sa 2nd batch team, ilang nakita ang guba nga generator sets nga kinahanglang ayohon aron dunay dugang suga sa maong komunidad gawas sa pila ka solar-powered lights.
“Atong ilisdan, atong palitan,” pasalig ni Kuya Gob nga andam “motapal” tungod ug alang sa mga IPs nga nakulangan ug pansin sa gobyerno sa daghang panahon.
Tungod sa RPSB, napasayon sab ang pag-surrender sa mga kanhi rebelde uban sa ilang mga armas, pagtukod ug mga People’s Organizations (POs) ug mga livelihood programs. Nanguna sab ang RPSB sa pagtukod sa nangunang panginahanglan sa water reservoir ug nagsilbing “tulay” sa mga IPs ug espisipikong ahensya sa gobyerno nga motubag sa problema.
Ang DavNor RPSB program nakatabang sab nga mahimong Best Police Provincial Office ang Davao del Norte sa tibuok Pilipinas.
“Nahimo tang “the best” kay nakita sa kapolisan sa national police ang serbisyo nga atong ginahatag sa atong katawhan sa probinsya; ang sakripisyo sa atong tao para maabot lang ang pinaka-layo nga lugar para mahatag ang serbisyo,” matod ni Provincial Director Police Colonel Ranie Hachuela.
