Una sa listahan sa DavNor KAAGAPAY (KAwsa sa AGrikulturA ug PAnginabuhian sa barangaY) ang lungsod sa Asuncion. Gipasibaw ni Kuya Gov Edwin I. Jubahib nga tumong sa maong programa ang malungtarong agrikultura aron mahatagan ang katawhan sa supisyente nga suplay sa pagkaon. Dugang niini, naglaom usab si Kuya Gov nga mamahimong “Food Basket” ang Davao del Norte sa rehiyon aron dugang kita sa mga dabaonon nga musalmot sa maong programa.

Gilakbitan usab ni Kuya Gov ang laing issue sama sa COVID-19 ug insurhensiya nga diin aduna usab dakong kalambigitan kung nganong namugna ang DavNor KAAGAPAY. Iyang gipasabot nga mas dali makab-ot ang kalamboan kung mawala na ang armadong pakigbisog aron makasentro ang budget sa panggamhanan ngadto sa mga mas bulawanong butang alang sa maayong kaugmaon sa probinsya.

Gitagaan usab ug higayon ang mga punong barangay nga personal makahinabi ug mapangutana si Kuya Gov.

Mapasalamaton si Mayor Eufracio Dayaday, Jr. nga mapakusgan ang agrikultura sanglit daghan sa mga lumulupyo sa Asuncion mga mag-uuma.

Pormal usab nga gipresenta atubangan sa mga opisyales sa lungsod ug mga punong barangay ang mga Barangay Extension Workers nga mao ang mugiya sa mga katawhan alang sa implementasyon sa DavNor KAAGAPAY.