Pormal nga gilusad ni Kuya Gob Edwin Jubahib ang DavNor Health and Wellness Program sa Kapitolyo nga nagtumong sa maayong panlawas ug kahimsog sa mga empleyado, ilabi na karong panahon sa pandemya.

Lakip nga gisugdan ubos sa programa ang aktibidades sa Zumba, Cycling, ug Running, diin gipakita ni Kuya Gob ang iyang kabaskog pinaagi sa pagpanguna sa pag-bike, pagdagan ug pag-zumba.

Kauban niya ang mga department heads ug mga empleyado, sa panguna ni Provincial Administrator Engr. Josie Jean Rabanos.

Gipahingusgan sa gobernador nga gikinahanglang sigurohon sa mga kawani ang ilang panlawas, aron padayon nga produktibo ug pakusgan ang resistensiya sa panlawas batok sa COVID-19.

“Bisa’g luyo sa pandemya, gikinahanglan gihapon nato ang exercise. Pero kinahanglan ma-observe nato ang social distancing, wearing of face masks, ug regular check-up sa body temperature. Kay basin diay nag apil apil diha ug zumba unya taas na diay ang temperature. Basin naay mag zumba diha nga gi ubo o gi sip-on, para safety sa tanan ayaw na ug apil. Bisag muapil sa running sa cycling kinahanglan na check-up tanan nga participants,” ingon ni Kuya Gob.

Nagpahinumdum si Kuya Gob nga kanunay mag-amping ang matag-usa samtang wala pay vaccine kontra Covid-19.

“Kung magsakit mo, unang apektado inyong pamilya, ang ikaduhang apektado ang inyong kauban sa opisina so kinahanglan mag binantayay gyud ta mintras wala pa tay vaccine. Dapat careful ta sa atong sarili. Ikaw man ang number one na naghatag ug proteksiyon sa imong kaugalingon. Ako nga inyong governor igo ra ko magpahinumdom ninyo,” dugang sa gobernador.

Adunay tigpito ka representante gikan sa lahi-lahi nga mga clusters sa mga opisina sa Kapitolyo nga miapil sa paglunsad sa mga aktibidades na Running, Zumba, ug Cycling.

Gipasabot ni PSYDO PG Department Head Giovanni Gulanes nga nahimugso ang DavNor Health and Wellness Program tungud kay lisod na ipahigayon ang tinuig nga DavNor Capitolympics tungod sa pandemya.

Dugang niyang gisaysay ang kamahinungdanon sa ehersisyo aron masiguro ang kalig-on ug pagkaproduktibo sa mga empleyado panahon sa public health emergency.

“Mando ni Kuya Gob nga dili rason nga aduna tay pandemya sa Covid nga diha nalang ta mag sigeg kaon, nga diha nalang ta magpadako, nga dili nalang ta mag exercise. Ang pinaka objective jud ani gawas sa mental ug physical health, mas maging productive kita nga empleyado para sa atong pinalangga na probinsya. Wala naman gyud tay Capitolympics, nonetheless, with our creativity, nahimugso ang isa ka ideya na DavNor Health and Wellness Program. This is now the Capitolympics in New Normal,” sulti ni Gulanes.

Gipahitabo sab ang oath-taking sa mga opisyales sa bag-ong DavNor Employees Bikers Association.

 

 

 

 

 

DavNor News