Padayong nanawagan si Kuya Gob Edwin I. Jubahib sa mga katawhang Dabaonon sa pag-amping ug pagmabinantayon kanunay, ilabi na kay duna nay natala nga local transmissions sa COVID-19 sa lalawigan sa Davao del Norte.

“Kinahanglan ma-observe nato kanunay ang social distancing, pagsuot sa face masks, paghugas kanunay sa kamot, paglikay sa mga tapok-tapok, regular check-up sa body temperature, ug uban pang safety protocols,” maoy balik-balik nga pahimangno sa gobernador sa mga local functions nga iyang ginaadtoan.
Hangtud adlawng Byernes, Agosto 14, tulo na ka LGUs sa Davao del Norte ang dunay record sa local transmission sa sakit nga COVID-19.

Matod ni DavNor COVID-19 Task Force Commander Dr. Alfredo Lacerona nga ang syudad sa Panabo, lungsod sa Sto. Tomas ug Kapalong dunay pipila nga natakdan bisan kung wala kini makagawas (travel history) sa probinsya.

“Naa na, kadtong naigo nga mga frontliners. Duha sa Sto. Tomas, usa sa Kapalong,” matod ni Dr. Lacerona samtang gi-interbyu Byernes sa buntag.
Sanglit dili pa magamit ang bag-ong gi-instalar nga Quick Response (QR) code dugang sa COVID-19 Task Force commander nga hingusgan gyod ang contact tracing bisan kung “mano-mano” lang una ang paghimo niini.

“I-strengthen lang gihapon ang contact tracing. Sa contact tracing man gud ma-identified nimo kinsay contacts, i-isolate nimo para di na siya further ka-increase sa iyang transmission. Mas maayo unta naay electronic kay mas dali nato i-trace kinsay iyang mga contacts kay karon “nangapa” pa asa sila moadto,” padayong pahayag ni Dr. Lacerona nga mao sab ang department head sa Provincial Health Office sa DavNor Kapitolyo.

Dugang pahayag ni Lacerona nga sa Panabo City, health worker ang nag-positive ug nakadawat na sab siya ug report nga naa na pod nag-positive nga residente bisan kung wala kini maka-biyahe gawas sa probinsya. Nanghinaut sab si Lacerona nga ma-implementar niining semanaha ang QR code.
Sa gihapon ang iyang kanhing panawagan iyang gipalanog pag-usab.

“Basic health protocols, pag-mask, physical distancing, frequent washing of hands. Di lang gyod unta mag-gawas kung dili importante. Mao na siya ang ‘the best’ aron ma-minimize ang exposure kay wa man good ta kabalo karon kung kinsa ang nagbit-bit ani,” awhag-hangyo ni Lacerona.

Gihangyo-panawagan pod sa COVID-19 Task Force commander ang pribadong sektor ug mga establisamento sa ilang kooperasyon aron mahimong epektibo ang pagpugong sa sakit.

Hangtod Byernes sa buntag may nadugang 9 ka positibong kaso sa COVID-19.

 

 

 

DavNor News