“Di gyud malikayan naa gyoy mga bagulbol ana mahitabo.”

Mao kadto ang matinud-anong pagbutyag ni Mayor Ernesto “Tatay Erning” Evangelista sa among pakighinabi atol sa gipahigayong pampublikong pagdungog (public hearing) didto sa Sto. Tomas Municipal Gymnasium niadtong Huwebes, Agosto 20, 2020.

Dunay mga mitumaw nga mga pangutana ug kabalaka sa panahon sa “Question and Answer” sama na lang sa balayronon sa certification sa mga binuhing hayop sanglit pipila ka mga barangay sa maong munisipyo naga-issue ug certificate of ownership ug permit to travel. Ang probinsiya naga-issue usab ug veterinary health certificate ug shipping permit nga hantud sa kasamtangan libre pa. Inig mahimong ordinansa ang sugyot nga bag-ong balayranan, madoble na ang gastos sa mga katawhan.

“Ang akong naluy-an dinha kay magdoble na ang bayronon. Luoy pud kaayo ang hintungdan labi na nga ang hayop ila po’ng ginabantayan. Gawas niana gusto pud nila mabalhin sa laing lugar. So bug-at na pud siguro sa mga tao ang ing-ana. Ang ako lang dira nga maklaro ni nga no need na ba nga magkuha pa sila ug barangay certification kay magkuha naman sila sa probinsiya,” pagpasibaw sa iyang kabalaka ni Kapitan Elpidio Magas, Brgy. San Vicente, Sto. Tomas.

Dugang pa niini, ang mga animal pets (iring ug iro) nga mokabat P50 kada usa puhon, inig ibyahe, kini ba puridas o depende sa breed. Nagpasalig si BM Roy Catalan, Chairman sa Committee on Ways and Means/Games and Amusement, nga tagdon ug tun-an pagdugang nila ang maong mga pangutana kauban sa Provincial Veterinary's Office aron mahatagan katin-awan.

Gipasabot ni Mayor Tatay Erning nga bisan nga dunay magreklamo sa iyang ginsakopan, dili pasabot nga dili na sila mosuporta sa mga programa sa probinsiya. Nuon, nagpakita lang ni sa ilang pagpakabana ug pakighiusa. Iya usab paningkamotan nga motabang sa pagpasabot kanila tungod kay kining tanang bag-ong bayronon alang sa kalamboan sa tanan.

“Sauna change is coming. Karon lahi na, change is working na gyud. Change is happening… Sa ila nga kuan karon. Wala siguro problema kay nakita man nila unsa ka sinsero ang pagpadagan sa gobyerno karon,” matod sa mayor.

Kahibaloan nga nagpahigayon usab ug public hearing nianang adlawa didto sa munisipyo sa B.E. Dujali.