Nagrally kagahapong adlawa atubangan sa Kapitolyo sa Lalawigan sa Davao del Norte ang mga IPs gikan sa Talaingod, Davao del Norte ug Laak, Davao de Oro sa gipahigayon nga hearing sa kaso nga giatubang ni kanhi Bayan Muna Representative Satur Ocampo.
Singgit sa mga tribu nga dili angay nga i-dismiss sa gobyerno ang mga kasong human trafficking, kidnapping, ug child abuse nga gipasaka batok ni Ocampo.
Kahinumduman nga si Ocampo, ug 17 ka mga kauban niini, naharang sa checkpoint sa mga awtoridad sa Talaingod, Davao del Norte niadtong Nobyembre 28, 2018 kauban sakay sa ilang convoy ang 14 ka mga menor nga kabataang IPs nga walay parental consent, hinungdan nga gipasakaan sila sa maong mga kaso.
Gikondenar sa mga tribu ang padayong pagpahimulos sa mga leftist organizations sa mga IPs para sa ilang kaugalingong political agenda. Sulti sab nila nga wala nahasubay sa kulturanhong aspeto sa mga IPs ang pagdasig ug pagpugos kanila sa mga leftist ug NPA nga makigbatok sa kagamhanan.
Sa interview kang Asenad Bago, kanhi estudyante sa Salugpongan School sa Sitio Dolyan, iyang gisaysay ang ilang katuyuan nga babagan ang lihok sa kampo ni Ocampo nga ma-dismiss ang iyang mga kaso. Buot nilang magtingkagol sa bilanggoan si Ocampo ug iyang mga kauban tungud sa ilang gihimong pagpangilad ug pagpanlapas sa tawhanong katungod sa katawhang IPs.
“Daghang nangamatay nga IPs tungud sa tribal war tungud nila. Gihimo sab ming negosyo ug gibaligya mi nila Satur Ocampo ug iyang kaubanan sa laing nasud aron makakwarta sila og dako. Ug unsa gihimo sa amo-a. Igo ra ming gihimo nga tig-rally batok sa gobyerno,” sulti niya.
Gipasalamatan sab ni Bago si Kuya Gob. Edwin I. Jubahib sa daghang hinabang ug proyekto nga iyang gibubo sa Talaingod ug sa mga tribu, sama sa pag-abli sa bag-ong kadalanan, pabalay, panginabuhian, mga seedling sa high-value crops ug uban pang mga programa ug proyekto.
“Karon nga bisan dunay pandemic, nagpadayon jud ang mga proyekto ni Kuya Gob sa Talaingod. Ginabisita mi niya kanunay ug wala jud mi niya gibiyaan,” butyag ni Bago.
Dugang niya nga sukad nga misuporta sila sa tinuod nga gobyerno, milambo na ang ilang kinabuhi. “Nakatanum na mi ug 10 hectares nga abaca. Nakapatindog na mi balay. Nakapalit na mi motor. Makapalit na mi sa among gustong paliton,” ingon siya.
