GIPATIN-AW ug gipasabot pag-ayo ang mga usbaw bayronon sa Luntiang Paraiso Regional Rehabilitation Center (LPRRC) atol sa Public Hearing on the Proposed Updating of Fees and Charges ilawom sa Provincial Tax Ordinance No. 2017-001 sa Davao del Norte.

Didto sa New Corella, “mihangyo” ang barangay kagawad tungod kay “taas ra” ang gituboan sa mga bayronon sa magpa-rehab sa LPRRC.

“Hangyo lang ning akoa kay sa tan-aw gyod nako dako, perteng taasa ang giuswag. Dire sa Article AC Luntiang Paraiso Regional Rehabilitation Center Fees and Charges, pwede ba ni kay proposed pa man, reduce-reducesan nato gamay. Kay sa panglantaw nako imbes tabangonon ang tawo ato na nuon gidugangan,” matod sa Barangay Kagawad sa Sta Fe, New Corella.

Sa karon, ang matag bulang bayronon sa magpa-rehab nga taga DavNor ubos sa Kategoriya A mobayad ug P8,000 ug sa proposed Revised Revenue Code himoon nga P12,000; Kategoriya B gikan P5,000 ngadto P8,000; Kategoriya C P2,500 ngadto sa P5,500; Kategoriya D P1,000 ngadto P4,000; ug, Kategoriya E nga kaniadto walay bayad mohatag na ug P3,000. Ug alang sa taga-gawas sa DavNor ang kanhi P12,000 himoong P15,000 samtang ang kanhi P8,000 himoon P12,000 matag bulang bayronon.

Ilawom sa administrasyon ni Gobernador Kuya Gob Edwin Jubahib gipauswag niini ang kahimtang bisan sa mga residente nga gi-rehab diha sa LPRRC.

“Nganong ato nang gi-propose? Tungod kay as of now daghan kaayo ta’g gihimo nga mga katikaran sa Luntiang Paraiso. From 70 pesos nahimo siyang 120 pesos. Naa na siya’y duha ka sud-an, gulay, main dish, naa pa gyo’y prutas. Kay kadaghanan sa atong residente ang reklamo dili kalakaw, luya ang lawas kay kulang ug potassium pag-abot gyod nila. So kulang ilang pagkaon didto pa lang sa jail,” pasabot sa usbaw ni LPRRC head Dr. Joseph Nilo Parreñas labot sa pagkaon ug libreng tambal ug vitamins ngadto sa mga residente.

Gawas sa pagkaon, ang LPRRC nag-hire ug tulo ka nars alang sa 24-oras nga duty, duha ka psychometrician (psychologists), dugang house-parents nga 24-oras mobantay sa 150 ka mga residente, paghimo’g 45 ka shower nga gigastohan ug P3 milyones sa probinsya (6 lang pagka- karon), bag-ong medical-dental clinic ug mga gamit, medical-dental wards, isolation wards, holding area ug CRs gawas sa bilding sa babaye ug lalaki.

Ang DavNor 85% nagsalig sa Internal Revenue Allotment (IRA). Sama sa New Corella gipasabot ni Committee Ways & Means Chairman BM Roy Catalan ang gikinahanglang usbaw didto sa Carmen.

“Ang probinsya sa Davao del Norte nagsalig lang sa IRA. Daghan ta’g gigastosan. Naa ta’y gipamalit mga materyales sama sa 2D Echo, kanang sa heart. Way problema sa paglibre sa mga kabus apan sa maka-afford atong pangayoan. . Human sa public hearing sa New Corella, miadto ko sa Luntiang Paraiso. Didto ang water refilling. . Ang purpose ana, kita na ang mo-supply sa mga hospitals sa Davao del Norte, sa mga opisina sa Capitol, mga opisina sa LGUs nga gusto’g mineral ug alkaline water,” pasabot ni BM Catalan.

Tungod sa usbaw mikomento ang pipila ka barangay opisyales uban sa hangyo nga dili lang ibutang ilang pangalan nga “bawal ang mag-adik” kay mahal na ang bayad sa LPRRC.

 

 

 

DavNor News