Buot himoong Fish Center sa Mindanao Development Authority (MinDA) ang upat (4) ka mga Local Government Units (LGUs) sa Davao del Norte aron gawas sa matabangan ang gakalisud nga mga mangingisda sa ilang panginabuhi, mapalambo usab ang ekonomiya sa probinsiya.
Usa sa wala kaayo natagad nga sektor nga dunay dako nga potensyal sa pagpauswag sa ekonomiya sa Mindanao ang fisheries industry ug aquaculture. Sa dugay’ng panahon kanunay’ng mulo sa mga piskador, o bisan pa man sa ubang mga mag-uuma ang pagkalugi sa ilang panginabuhi tungod sa kawad-on sa pasilidad nga moproseso sa ilang daghang abot ug ang haum nga merkado nga andam mopalit sa ilang ani.
Mao ‘ni ang gustong tutokan ni MinDA Sec. Emmanuel “Manny” Piñol ug matud pa niya nga dako ang export demand sa atong mga isda ug hi-value commodities labi na sa mga silingang nasud sa Asya tungod sa de-kalidad nato’ng produkto. Nahimong target sa MinDA sa umalabot nga lima ka tuig ang pagtukod ug dili moubos sa 22 ka mga fish centers sa tibuok Mindanao diin upat niini gikan sa DavNor nga gilaumang matuman sa dili pa matapos 'ning tuiga o sayo sunod tuig.
“We are planning to put up 22 fish centers all over Mindanao. Ang purpose niini nga matabangan nato atong mga fisheries stakeholders nga mahatagan sila’g facilities sama sa ice plant, cold storage, blast freezer. Unya naa silay processing facility para ang mogawas sa atong mga fishing grounds, dili natong kinilo nga isda kondili ready for the market na,” sumala ni Sec. Piñol.
Ang Bureau of Fisheries and Aquatic Resources - National Mariculture Center nga nahimutang sa Panabo City maoy usa sa dugay nang napilian tungod sa naestablisar niining abunda nga isdaan. Ilado sa dagko ug lamian nga bangus nga ginabuhi sa tulo (3) ka ektaryang fish cage tunga-tunga sa dagat. Apil usab nga himoong fish center ang Carmen, Tagum City ug Island Garden City of Samal.
Planong mag-organisar ug kooperatiba si Gobernador Edwin “Kuya Gob” Jubahib sa upat ka mga LGUs nga langkuban sa mga gagmay’ng mangingisda. Dugang ni Kuya Gob nga dakong kahigayonanan kini aron matabangan ang mga piskador. Hatagan usab ang maong kooperatiba ug fish cage sa gobyerno aron magalam ug mokita gikan niini.
“Through the cooperative, ato silang matabangan nga mas mokita ug dako ug usab ang atong mga fish cager sa bangus mas maenggaño nga mo-expand sa ilang negosyo,” panghinaut sa gobernador.
Pinaagi sa digital platform mamonitor ang kuha ug matang sa matag isda kada adlaw sa nagkalain-laing fishing grounds. Konektado usab kini sa virtual market.
Maggikan ang pondo sa proyekto sa 2.1B grant sa European Union ilalom sa Mindanao Rice Program.
