Inila nga usa ka prestihiyosong kompetisyon sa gobyerno ang Gawad Kalasag Award dili lang sa lokal nga lebel ingon man sa nasyonal nga entablado. Kuti ug dili sayon ang pagpili sa angayang hatagan sa maong pasidungog nga modagan sobra unom ka bulan. Gikan pa sa nagkalain-laing ahensiya sa gobyerno ang gipiling evaluators aron masigurong patas ang mahimong pagtimbang-timbang.

Niining tuiga, taliwala sa pandemia, gipahigayon gihapon sa Provincial Disaster Risk Reduction Management Council (PDRRMC) sa Davao del Norte pinaagi sa virtual conferencing ang ikatulong tuig niining Provincial Gawad Kalasag Awarding Ceremony. Giingong usa ‘ni ka dakong kalampusan alang sa probinsiya sanglit sa tibuok Rehiyon XI ang DavNor lang nagapahigayon niini diin mokabat P3M nga pondo ang ginagahin matag tuig.

Tumong sa maong programa nga mapalig-on ang pagpangandam ug pagrekober sa mga eskwelahan batok sa mga katalagman labi na ang mga hilit ug lagyo nga mga lugar. Dako na lamang ang kalipay sa PDRRMC sa pag-apil sa usa ka lumad nga eskwelahan nga nahimutang sa Sitio Salawao, Talaingod, ang Datu Jose A. Libayao Memorial National High School (DJALMNHS).

“Kini nakita namo nga kinahanglanon gyud diay namo especially sa among lugar nga prone sa landslide kay ang eskwelahan nabutang sa bukid,” pagsaysay ni Mr. John Carlo M. Pacana, School Head, DJALMNHS.

Ginama sa mga natural nga materyales nga makita sa palibot ang ilang mga gamit pang-emerhensiya sama sa bani sa saging, kawayan ug bukong sa lubi. Pagpamatuod ‘ni nga dili babag ang kawad-on aron mahimong andam sa bisan unsang emerhensiya. Nakasungkit sa ikaduhang ganti ang nahisgutang tunghaan ubos sa kategoriyang Medium Secondary School.

“Among gigamit nga alarm system is katong bamboo kay mao man gud among naandan. So alarm system is bamboo. Ginagamit pud namo ang trumpa, megaphone kay panahon sa landslide ug linog, mao dayon among makita ug ma-adapt sa tanan,” dugang sa school head.

Sumala sa ubang mga contestants nga ipadayon nila ang ilang pag-apil hantud naay Gawad Kalasag nga programa.

“Nahasa ang mga teachers, ang team sa among SDRRM, nga buhaton ang dapat buhaton especially sa pagbutang sa mga constituents to a safe place panahon sa linog ug even panahon sa calamity sa barangay,” pagpasibaw ni Mr. Roger A. Martinez, Principal IV, Tagum City National High School.

“Winning the competition is definitely a push for us to really work more for us to be prepared in any disaster. We can use this money to improve and we have several proposals to really enhance the disaster risk management system of the college,” sigon ni Dr. Joy M. Sorrosa, President, Davao Del Norte State College, Panabo City nga midaog sa unang ganti sa higher education institution category.

Puros mananaug ang 13 ka tunghaan nga misalmot karong tuiga tungod kay silang tanan nakadawat ug cash price, duha ka emergency grab kit, ginatawag sab ug “balde of life” nga naay sulod transmitter radio, flashlight, sardinas, bugas ug alkohol; ug laing lima ka first-aid kit. Ang unang mananaug nakadawat ug 50 mil, 30 mil ang ikaduha, 20 mil ang ikatulo ug 5 mil ang consolation. Gawas pa ana, dili kabayran ang kaalam ug kasinatian nga ilang nabat-otan labi na sa panahon sa krisis.

Gipaabot ni Mr. Eric R. Rosillo, Local DRRM Officer II sa DavNor, kuyog si PDRRMD Head Glenda O. Delideli ug ang kinatibuk-ang buhatan, ang iyang pasalamat sa aktibong partisipasyon sa mga eskwelahan. Dugang niya lampas sa ilang gidahum ang ilang gipakitang kooperasyon ug pagpangandam.

“Nakita nato nga ang gi-expect nato nga sakto ilang documentation, sakto ang pag-implement sa mga programa kabahin sa School Disaster Risk Reduction Management Program, nasabtan pud diay kini sa mga estudyante. So, mao na ang pinakanindut nga expectation nato kay it only shows nga dili lang diay sa mga plano, dili lang diay pag-gather sa mga documents, pero mismo ang mga estudyante which is sila ang prime nato nga purpose nga maandam panahon sa disaster,” pagsubay ni Rosillio.

 

 

 

DavNor News