Midawat og hinabang gikan kang Kuya Gov. Edwin I. Jubahib ang 59 ka mga hog raisers nga naigo sa gikahadlokang sakit sa baboy nga African Swine Fever (ASF) sa Barangay Cagangohan, Panabo City.
Gipangunahan ni Provincial Administrator Engr. Josie Jean Rabanoz ang pagpang-apud-apud sa hinabang sa mga nagbuhi sa baboy nga apektado sa pagkuyanap sa sakit sa barangay.
“Gusto ipaabot ni Kuya Gov iyang kasubo sa mga hog raisers. Kanunay nga naa ang atong gobyerno nga mosuporta sa atong mga partners ilabi na sa atong mga hog raisers sa Panabo,” sulti ni Rabanoz.
Tig-P1,500 ang nadawat sa mga hog raisers matag-baboy gikan sa Kapitolyo, samtang giandam sa sab ang susamang kantidad gikan sa city government. Modawat pud sila og dugang tig-P5,000 kada baboy gikan sa Department of Agriculture.
Kahinumduman nga gimando dayon ni Kuya Gob ang lockdown sa maong barangay human naigo sa ASF ang 12 ka baboy sa lugar. Tuod man, wala nakatabok sa ubang mga barangay ang sakit tungud sa paspas nga pagresponde sa gobernador, uban ang DA-XI ug city government.
Saysay ni Rabanoz nga prayoridad ni Kuya Gov ang food sufficiency, mao nga kinahanglan magtinabangay ang tanan aron dili lisod makab-ot ang maong tumong.
“Goal jod ni kuya Gob ang food sufficiency and unsaon pagka sufficient sa food kung ang atong industry sa baboy kay apektado. Sama sa ingon kagabii ni Secretary DAR nga wala lagi daw vaccine aning ASF and ang iyaha ra jod hangyo kay magtinabangay tang tanan kay sa atoa ra jod daw ang control ana. So atong vet, dako kaayo ni hagit sa ilaha adto pod sa atoang hog raisers kay kinahanglan jod ang awareness ug ang information kung unsa jod ang dapat bantayan,” dugang niya.
Mapasalamaton kaayo si Arturo Ang sa iyang nadawat nga P58,500 para sa iyang 39 nga baboy nga gi-cull, kay dako kini og tabang aron makasugod na sad siya sa bag-o nga panginabuhian.
“Nagpasalamat jud ko sa atong gobyerno kay naa jud silay tabang ba. Wala naabot ug one month na serve man dayon ilang ayuda. Ang himuon namo, mag stop sa mi sa baboy kay bawal pa kay naa pa man tay ASF. Ang buhaton nako, magbuhi sa kog kanding para akong ipuli sa akong kulungan unya magtanom pod ko. Mao ni akong buhaton kay murag one year pa baya bag-o ko makabalik. Kay sayang man pod ang kapital kung patakaan nato ug gasto basin diay makabawi ko sa kanding,” ingon ni Ang.
