USA ka publiko ug pribado nga pagtinabangay ang gipasiugdahan sa probinsyal nga kagamhanan sa Davao del Norte ug Davao Multi-Purpose Seed Producers Cooperative (DAMSEPCO) sugod kagahapon Lunes (Agosto 1) hangtod na sa Myerkoles (Agosto 3).
Ang 3-ka adlaw nga pagbansay magtutok sa Refresher Course Training on Inbred Rice Seed Production & Certification for Seed Growers nga gipahigayon didto sa Provincial Cooperative Union building, Magdum, Tagum City ug ang laing 2-ka adlaw nga adto sa mga umahan (field training).
Matod ni Edgar C. Cabrera, ang OIC-Chief CSAED sa Provincial Agriculture Office (PAGRO) sa Davao del Norte nga bisan kun ang kadaghanan maoy mga sertipikadong seed producers na sa probinsya apan ang pagbansay pag-usab (re-training) maoy kinahanglanon aron mapabilin ang pagkahimong certified seed growers.
“Ang katuyoan ning atong pagbansay bisan kun daghan kaninyo miagi na ug training maoy pagtuman sa requirements. Great leaders, great minds continue to learn,” pasabot ni Edgar Cabrera sa kahinungdanon sa padayon nga pagkat-on.
Kahinumduman nga sa miaging 2015 nakab-ot sa Davao del Norte ang Rice Achievers Award taliwala sa 16 ka rehiyon sa tibuok nasod ug nakadawat ug P4M nga premyo. Ang Davao del Sur nailhan usab nga numero uno sa hybrid nga humay.
Tungod kay silingan ra sa Davao del Sur, gitumong karon sa DavNor nga gikan sa 334 ektaryas nga gideboto alang sa tanom nga humay, gitutok niini ang paningkamot nga matamnan ang 10,000 ektaryas nga luna. Ang kabahin sa premyo nga P1.5M igahin alang sa hybridization program samtang ang uban gamiton alang sa pagtukod ug Farmers Training Center aron pa gyod mapausbaw ang kahibalo sa mag-uuma sa humay.
Sa mensahe nga gipadala ni Gobernador Anthony del Rosario, iyang gipanghinaut nga bisan pa man kung nakaagom ang probinsya sa El Niño ug karon nag-atubang sa umaabot nga La Niña, nga makahimo gihapon ang Dabaonon sa pagbarog luyo sa mga giatubang nga kalamidad.
“Dili gayod mapugngan ang El Niño labina ang La Niña; but we can mitigate the effects of it. Usa na niini ang maayong klase sa binhi nga gamiton. Ug sa walay duhaduha mao kana ang katuyoan sa inyong panagtigom karon,” matod sa iyang mensahe nga gipaabot pinaagi kang Mr. Nemesis Nuñez.
Gawas sa paningkamot pinaagi sa maayo ug syentipikanhon nga pamaagi sa pagpanguma sa humay nga gipangunahan sa Provincial Agriculture Office, ang Davao del Norte naggahin usab ug pondo alang sa insurance premium sa mga rice farmers.
“Since 2013 pa, ang kanhing administrasyon ni Gobernador Rodolfo del Rosario naggahin sa sinugdan ug P1.3 million. That is for the province’ share on premium for the insurance of rice per cropping season. We wanted this to be maximized by our rice farmers’ para ma-cover-up whatever losses we encountered,” padayon ni Mr. Nuñez nga nagdasig usab sa mga mag-uuma nga pahimuslan ang maong programa.
Ang katabang sa PAGRO nga DAMSEPCO nailhan na sulod sa daghang katuigan nga nagpatungha ug de-kalidad nga mga binhi sa humay ug padayon pa nga nagpauswag sa ilang teknolohiya. Nanguna kini alang sa “Palay Check” nga programa aron gayod maseguro ang kalidad sa matag lugas sa semilya nga matanom sa mga mag-uuma. (pioDavNor)
