Laing sinako nga mga preskong gulay ang gihatod kagahapon sa grupo sa 56IB, 7ID sa Philippine Army didto sa DavNor Pasalubong Shop, Capitol Compound, Mankilam, Tagum City. Ang maong mga ani bunga sa pagpaningkamot sa mga mag-uuma sa mga sitio sa Talaingod.

Giasikaso gyud dayon sa mga personahe sa Davao del Norte Investment and Promotion Center (DNIPC) ang mga gulay aron mahatud ang bayad sa mga mag-uuma sa labing dali nga panahon ug mabaligya ang mga produkto sa mga interesadong lumulupyo. Ang maayong relasyon ug pakiglambigit tali sa mga sundalo ug mga mag-uuma bunga sa pagpaningkamot sa Philippine Army ug maayong panggobyerno sa lokal nga panggamhanan ubos sa administrasyong Kuya Gov. Edwin I. Jubahib.

Ang mga gulay produkto sa mga sitio sa Dangulog, Banwaloy, Lambid, Ginubatan, Misuloksulok, Nasilaban, ug Tibucag sa Lungsod sa Talaingod. Sa tabang sa mga sundalo, napaabot ang mga produkto sa tama nga merkado aron tama usab ang mga presyo niini.

Tulo ka higayon sa usa ka semana makababa ang grupo sa mga sundalo aron sa paghatod sa mga gulay didto sa DNIPC. Ang mga produkto mapalit sa DavNor Pasalubong Shop gikan alas 8 sa buntag hangtod alas 5 sa hapon.

 

 

 

 

 

DavNor News