NADUGANGAN na pod ug bag-ong baynte uno (21) ka kaso sa COVID-19 positive ang Davao del Norte.

Kini ang pinaka-daghang positibo sulod lang sa usa ka adlaw ang natala dinhi sa probinsya sukad niadtong bulan sa Marso.

Pinakadaghan niini, 13 ka bag-ong kaso gikan sa lungsod sa San Isidro (Sawata) nga mga Locally Stranded Individuals (LSIs) gikan sa Manila, Boracay ug Pangasinan ug 1 ka Returning Overseas Worker.

Ang Tagum City duna sab bag-ong tulo (3) ka kaso nga pulos na-expose sa nagka-COVID-19 samtang tulo (3) ang sa syudad sa Panabo nga pulos sab exposed samtang isa (1) ang sa lungsod sa Carmen nga LSI.

Hangtod ning pagsulat (Miyerkules), ang bag-ong 21 COVID-19 positive naghimo sa katibuk-ang gidaghanon 416 ka kaso samtang kagahapon sab adunay 2 nga naka-rekober nga miabot na ug 342 ug nagpabiling 6 ang nakabsan gumikan sa maong sakit.

Gumikan sa pagtaas sa kaso sa COVID-19, sirado ug walay transaksyon ang tibuok DavNor Probinsyal Kapitolyo, gikan Huwebes ug Byernes (Oktobre 15, 16) alang sa pagahimoong decontamination sa tanang opisina isip lakang sa pagpugong sa pagkuyanap sa sakit. Mobalik sa normal ang transaksyon karong Lunes, Oktubre 19.

Padayong nagpahinumdum si Gobernador Kuya Gob Edwin I. Jubahib ngadto sa publiko nga mag-amping sa kanunay ug estriktong sundon ang health protocols sama sa pagsuot ug face mask/face shield, paghugas sa kamot gamit ang sabon, pagsunod sa physical distancing, pagpakusog sa immune system ug magpuyo sa balay kondili lang gyod importante ang tuyo sa gawas.

 

DavNor News