Gibutyag sa mga taas nga opisyales sa Department of Health (DOH)-XI nga epektibo ang electronic contract tracing nga giimplementar sa lalawigan sa Davao del Norte, isip usa sa mga maayong paagi aron pugngan ang pagkuyanap sa Covid-19.
Sulti ni DOH-XI Assistant Regional Director Lenny Joy Rivera nga maayo ang resulta sa Davao del Norte Covid-19 Contact Tracing System (DCCTS) nga gipatuman ni Kuya Gob Edwin I. Jubahib.
"For Davao del Norte, na-implement naman nila ng buong province. So far, effective naman ang sa kanila. Nate-trace naman nila ang kanilang cases,” ingon si Rivera, sa gipahigayon nga One Davao on Covid-19 virtual presser sa milabay nga adlawng Biyernes.
Si Dr. Cleo Fe Tabada, ang hepe sa Regional Epidemiology and Surveillance Unit sa DOH-XI, midayeg usab sa inisyatibo sa Davao del Norte.
“This has been implemented in (Davao del) Norte and they are able to make use of it,” sulti niya.
Pinakauna ang Davao del Norte sa mga probinsya ug siyudad sa tibuok Rehiyon Onse nga mipatuman sa automated QR code system niini niadtong Agosto 17, 2020.
Aron masumpo ang nagkadaghang kaso sa sakit, mas striktong gipatuman ni Kuya Gob ang Moderate General Community Quarantine (MGCQ) sa probinsiya. Ug ubos sa Executive Order No. 63, sugod Nobyembre 3, 2020 dili na makasulod sa Davao del Norte ang ni bisan kinsa nga walay QR Code.
Ang tanang publiko ug pribadong establisamento usab gimandoan nga kinahanglang mogamit sa QR Code scanning, kuyog ang striktong pagpatuman sa “No Face Mask, No Face Shield, and No QR Code – No Entry Policy”.
I-tag sa DCCTS isip "traveller" ang mga tag-iya sa QR code nga mosulod-gawas sa probinsya, diin dili na sila pwedeng makasulod sa nasulti nga mga establisimento. Ginaabisohan sab sila nga mosunod sa 7-day home quarantine ug dili pagsulod sa mga pampublikong lugar.
Hangtud karong adlawa, anaa na sa 1.3 milyones ka QR code ang nahatag sa Kapitolyo sa mga residente ug taga gawas sa probinsya.
Butyag ni Provincial Human Resource Management Officer ug DavNor eGovernance Project Manager Edwin Palero nga padayon gihapon ang pagdawat sa probinsya sa QR code online application, diin sagad sa mga naga-apply nga taga-gawas gikan sa Davao City.
Gipa-overtime ni Kuya Gob ang mga pinili nga mga empleyado sa Kapitolyo aron humanon ang mga natanggong nga online application sa QR code.
