GILUWATAN ni Davao del Norte Gobernador Edwin I. Jubahib ang Executive Order no. 63-A ingong “dugang” sa EO 63 aron mahan-ay ang pag-implementar sa mga Local Chief Executives diha sa ilang mga ginsakpang LGU.

Kahinumduman nga ang naunang EO No. 63 nga giluwatan niadtong Oktubre 30, 2020 ug nahimong epektibo sugod niadtong Nobyembre 3-30, 2020 ngadto sa tanang LCEs para sa mas estriktong implementasyon sa Modified General Community Quarantine (MGCQ) diha sa matag LGU nga ilang gisakopan.

Ang mosunod gidugang nga mga giya sa Section 3 Executive Order No. 63, series of 2020:

1. Ang mga taga Davao del Norte nga gusto mobiyahe pagawas sa probinsya alang sa hinungdanon o dili-hinungdanon nga katuyoan mahimong mobiyahe pagawas basta mopailawom sila sa QR Code scanning diha sa mga checkpoints inig balik nila pasulod ug gikinahanglan silang mag-home quarantine sulod sa pito (7) ka adlaw;

2. Ang mga dili taga Davao del Norte nga gusto mobiyahe pasulod sa probinsya alang sa hinungdanon o dili-hinungdanon nga katuyoan mahimong pasudlon basta mopailawom sila sa QR Code scanning diha sa mga checkpoints apan dili sila tugotan nga mohimo ug transaksyon sa mga establisamento/opisina nga wala mag-implementar sa QR Code scanning sulod sa pito ka (7) ka adlaw gikan sa ilang pagsulod, gawas lamang sa establisamento/opisina nga ilang gipanag-iya o’ gipadagan;

Ang EO 63-A gipirmahan ni Kuya Gob niadtong Nobyembre 4 ug epektibo dayon.

Kagahapon lamang (Myerkoles, Nobyembre 11), gisugdan pagpahitabo ang miting tali ni Kuya Gob ug Carmen municipal Mayor Virginia Perandos uban sa mga Barangay Kapitanes pagka buntag samtang ang susama nga miting pagka hapon tali ni Tagum City Mayor Allan Rellon ug mga barangay Kapitanes sa syudad.

Hangtod Nobyembre 18 gitakda mahuman ang miting alang sa tanang LGU mayors ug mga kapitanes.

 

 

 

 

 

DavNor News