DILI lang karsada giabrihan ug Pabalay para sa mga Ata-Manobo nga nagpuyo sa Sitio Mondol, Gupitan ang gihimo sa administrasyon ni Gobernador Edwin “Kuya Gob” Jubahib, apil na sab ang eskwelahan para sa mga kabataan.

Andam na ang school site nga tukoran ug gihulat na lang maarang-arang ang panahon aron mahuman ang karsada nga magpasayon pagdala sa mga materyales.

Ang upat ka mga titser sa Sitio Tapayanon Elementary School diha na nagtudlo sa mga estudyante sa Sitio Mondol.

“Sa pagka-karon arang-arang na jud among kahimtang nga nabalhin na ang eskwelahan sa Sitio Mondol ikumpara nato didto sa Sitio Tapayanon,” matod ni school head Jeovan Bryle Tumale nga dili maka-estimate sa gilay-on tali sa duha ka sitios sanglit lasang ang ilang agianan kundili ang pagbaktas nga moabot 6-8 ka oras.

Matod sa school head nga sa 2020-2021 school year duna sila’y official enrolees nga 214 diin 16 ang kinder samtang 147 ang grade 1. Ang uban niana maoy Grade 2, 3, 4, ug 5 ug nga kinahanglan silang mag-multi-grade sanglit ang iyang kauban tulo lang ka buok maestro, mga Local School Board LGU-paid.

“Ang titser tagduha ka grade ang handle-lan. . so far mga fast learner (estudyante), kabalo na mobasa. Dako akong pasalamat sa akong mga kaubanan nga dako pod ilang sakripisyo, ilahang dedikasyon sa pagtudlo. Makita nato nga aduna gyo’d kausaban ug kalamboan pag-edukar aning mga bataa,” padayong pasabot ni titser Jeovan nga nanghatag sa mga learning modules sabay nga nagtimbang sa mga bata sa pakig-tambayayong sa Negrense Volunteers for Change (NVC) Foundation, usa ka NGO nga naghimo ug matag-adlaw “240 kids 6-month feeding program” sa Sitio Mondol.

Mapasalamaton kaayo kang Kuya Gob tungod sa pag-abri sa karsada, dugang gitug-an ni Titser Jeovan nga bisan maabot na ang Sitio Mondol sa ilang motorsiklo kung mag-init nagpabilin gihapon pangunang babag ang dalan sa pagdala sa mga kagamitan nga dili masulod kung mag-ulan.

“Usa gyod ang dalan, mga kagamitan, mga school supplies, lisod gyod lalo na wala pa mi saktong budget sa among eskwelahan. . . Ang dalan gyod mao ang number one. Mapasalamaton mi ni Governor, ni Congressman ug ni Mayor nga aduna na’y dalan, masulod na ang motor padulong dire sa eskuylahan. . Salamat sa inyong way puas nga suporta,” todo pasalamat ni school head Jeovan ug mga titser Dante Davao, Roldan Warag ug Jerome Sugatan.

Niadtong Nobyembre 23, personal nga gi-inspeksyon ni DavNor Provincial Engineer’s Office assistant department head Engr Jivelyn Co ang kahimtang sa Sitio Mondol.

“Karsada para mapadali pagtukod sa atoang Pabahay. . Naay eskwelahan, naa na mi development plan,” matod ni Engr Co nga nanghinaut moinit na sanglit matag adlaw nagsige’g ulan sa Sitio Mondol.

 

 

 

DavNor News