MAPADUOL pa gyod ang serbisyo sa dialysis niadtong depektoso ang kidney, laboratoryo sa COVID-19 testing ug dugang Isolation Facility alang sa taga Island Garden City of Samal (IGaCOS).

Gibisita ni Gobernador Edwin “Kuya Gob” Jubahib ang dapit tukoran sa Dialysis Center bilding, Molecular Lab bilding ug sa permanenteng Isolation Facility diha sa usa ka ektaryang luna nga gidonar ni IGaCOS Mayor Al David Uy kauban si DavNor PEEDO department Head Dennis Devilleres ug DavNor PHO department head Dr. Alfredo Lacerona nga dili ra sab halayo sa kasamtangang provincial hospital ug city hall, Disyembre 9, 2020.

Ang probinsyal nga administrasyon ni Kuya Gob ang magpatukod sa Molecular Lab ug Dialysis Center building uban sa mga dialysis machines samtang ang pondo alang sa molecular machine ug sa Isolation Facility building maoy gikan sa Department of Health (DOH).

Matod ni PHO Lacerona nga gikinahanglan gayod nga tukoron ang mga pasilidad sa laing lugar sanglit wa na’y luna kabutangan diha sa kasamtangang Provincial Hospital IGaCOS Zone.

Gihulat na lang ang pag-inspeksyon sa taga DOH sa maong luna ingon man ang ilang pag-tugot aron masugdan ang konstruksyon.

 

 

 

DavNor News