Gi-turnover sa Probinsyal nga Panggamhanan sa Davao del Norte ang duha ka bag-ong ambulansya nga Nissan Urvan NV350 ngadto sa probinsyal nga ospital sa Kapalong ug Carmen District.

Gikalipay sa duha ka mga chief of hospitals ang nadawat nga mga sakyanan tungod kay sa kasamtangan kung dili man guba, nagkadaut-daot na ang ilang mga ambulansya hinungdan nga gasalig sila sa ipagamit sa mga LGUs.

“Nangayo ta’g tabang sa mga LGU mayors. Sa akoa, sa Sikat cluster, gihangyo nako ang mga mayors nga motabang nga kung naa tay mga referrals nga gikan sa ilang mga lungsod, ang ilang ambulance ang atong gamiton,” pagbutyag ni Dr. Jessie T. Belga, Chief of Hospital, Kapalong Zone. “Pasalamat ko’g dako sa atong provincial government through Kuya Gob Edwin Jubahib nga nahatagan mi kay tungod ani dili ta maglisud kung naay mga referrals. So madali nato’g refer ang mga pasyente nga kinahanglan irefer sa DRMC.”

“First of all, I would like to thank the Department of Health and the Provincial Government of Davao del Norte for this initiative because kung wala ni siya, actually dako kaayo ni’g impact sa atoang community because we were able to serve our community well karon nga naa mi bag-ong ambulance,” pagpasalamat usab ni Dra. Juri B. Miyake, Chief of Hospital sa Carmen Zone.

Mibalor ug P2.2 milyon ang matag sakyanan lakip na ang mga ekipo sa sulod. Hamugaway ang mabati sa mga pasyente pati ang ubang sakay tungod kay gawas sa luag nga interior, bugnaw ang air-conditiong system ug kusgan ang 2.5-litro nga four-cylinder engine niini.

Sumala ni Provincial Economic Enterprise and Development Officer Dennis B. Devilleres, mas dako ang panginahanglan sa paspas nga mobilisasyon panahon sa emerhensiya karong dunay krisis sa covid labi na kung dunay comorbidity ang pasyente nga mokomplikado sa iyang kahimtang.

“Unsa may atong gamiton unya nga dad-on nato atong pasyente nga naglisud na ngadto sa mas dako ug kapabilidad nga ospital kung wala tay mga ambulansya,” pagpamatuod niya sa kaimportante sa mga sakyanan.

“Kining atoang mga ambulance karon, katong naa sa pinakatumoy, gikan na sa DOH nga gihatag sa atoang ospital sa Carmen. Kining isa, kining naa diri duol sa atoa, gikan sa SGLG. Nidaog man ta sa Seal of Local Governance. Ang nahitabo ani karon, nag-download sila’g kwarta isip premyo sa atong pagkadaug, portion of it gi-allocate para sa pag-purchase ani nga ambulance,” pagsubay sa PEEDO Head.