Nahigmata sa kamatuoran ang mga sakop sa Weakened Guerilla Front (WGF) 33 nga dili solbad sa suliran o kawad-on ang pagpasakop sa New People’s Army (NPA) ug paggunit sa armas batok gobyerno.
“Sayop jud ang paggunit nato sa pusil. Sayop jud ang pagsulod nato sa kalihokan kay dili ni siya pwede nga pamaagi aron masulbad nato ang problema sa atong nasud,” sulti ni Alyas ‘Khan’, ang kumander sa WGF 33.
Apil si Alyas Khan sa 27 ka mga sakop sa WGF 33 nga misurender human ang enkwentro nila sa mga sakop sa 60th IB sa lungsod sa New Corella sa milabay nga Desyembre 12, 2020.
Emosyonal nga gipadayag ni Alyas Khan ang iyang kalagot nga gihimo lang silang instrumento sa extortion activities aron moburot o mangurakot ang kadagku-an sa CPP-NPA.
Ingon siya nga sakit iyang buot nga bisan sa kita nila nga P1 milyon kada bulan sa pagpangilkil, walay pagtagad kanila ang kadagku-an sa partido komunista ug walay insaktong budget ang ginahatag para sa ilang mga anak ug pamilya.
“Sakit man gud sa akong buot nga ang among pamilya, among mga anak dili namo makuyog sa pila ka tuig. Dili nako madawat nganong nag-antos mi ani nga kalihokan,” pahayag niya atubangan sa mga miyembro sa media, atul sa gihimong press conference kaganihang hapon sa Campo sa 1001st IB sa Brgy Mapaang, Maco, Davao de Oro.
Miawhag si Alyas Khan sa iyang mga kaubanan nga anaa pa sa pakigbisog sa kabukiran nga mobalik na sab sa sabakan sa gobyerno, samtang mapasalamaton siya sa ubay-ubay nga hinabang nga ilang madawat.
“Dili jud ta mag-antos sa sulod kay wala jud tay kaugmaon… Naa diri ang atong kaugmaon sa gawas pinaagi sa tabang sa gobyerno,” awhag niya.
Nanguna si Governor Edwin “Kuya Gob” Jubahib sa paghatag hinabang sa mga nag-balik-loob pinaagi sa P10,000 kada isa kanila, tigpulo nga sako sa bugas ug bihon, ug panginabuhian ug serbisyo panlawas.
Gisaysay ni Kuya Gob ang daghang mga programa ug proyekto nga ginabubo karon sa gobyerno, sama sa mga kalsada, patubig, kuryente, livelihood ug health programs, ug uban pa, aron wala nay rason nga duna pay morebelde.
Dugang tig-P10,000 sab ug livelihood ang ihatag nila Governor Jayvee Tyrone Uy sa Davao del Oro ug Mayor Jorjan Federiso sa New Corella, samtang si 1st District Congressman Pantaleon Alvarez mohatag og skills training, scholarship ug mga tambal.
Kini gawas pa sa mga hinabang nga ilang madawat gikan sa Enhanced Comprehensive Local Integration Program (E-CLIP).
Sulti ni 10th ID Commander MGen. Ruben Basiao nga ang pagkapukan sa WGF 33 usa ka dakong kadaugan sa localized peace process sa kagamhanan.
Gipaniguro sab ni Eastern Mindanao Command (Eastmincom) Commander LtGen. Jose Faustino Jr. ang pagtapos sa insurhensiya sa nasud paghuman sa termino ni Pangulong Duterte.
Samtang gibutyag ni Regional Peace and Order Council (RPOC) Chair Governor Nelson Dayanhirang ang pagpalalum ug pagpakusog sa programa sa kalinaw sa Davao Oriental.
