GIPUY-AN na ug 21 ka mga kanhi rebelde (FRs) ang Balay Panaghiusa (Halfway House) nga nahimutang sa Doña Andrea, Asuncion Davao del Norte.
Ang mga gambalay nga gigastohan sa Department of the Interior and Local Government (DILG) ug singko milyones pesos ug laing duha ka milyon sa probinsyal nga panggamhanan ni Gobernador Edwin “Kuya Gob” Jubahib pormal nga gibuksan kagahapon, Enero 11.
“Dako ang akong kalipay nga nasabtan na ninyo kung unsa ang tumong ug tinguha sa atong gobyerno karon labina sa atong mahal nga Presidente Rodrigo Roa Duterte nga siya ang naghatag ug pondo niini pinaagi sa ahensya sa DILG. Kita sa probinsya mi-counterpart ug Two Million pesos to realize this project. . . . Special treatment gyod ang gihimo sa gobyerno sa inyong pagbalik tungod kay nakita namo nga uhaw mo sa serbisyo sa gobyerno mao nang gibutang mo dire sa Balay Panaghiusa,” matod ni Kuya Gob.
Ang Balay Panaghiusa magsilbing puy-anan sa mga kanhi rebelde gikan isa hangtod tulo ka bulan depende sab sa pamatasan sa mga FRs human sa mga trainings. Ang uban kanilang nagpuyo mga magtiayon ug dunay anak.
“Ang inyong kaugmaon maoy atong hisgotan karon nganong naa mo dire ug kun unsa’y inyong padulngan. Dinhi sa Balay Panaghiusa adunay daghang lecture, tudloan mo sa inyong pagpanginabuhi, training skills program para pag-uli ninyo duna na mo’y katrabahoan, pwede mo’ng mananum, pwede mamuhi ug kahayopan. Ingon ana ang suporta sa gobyerno,” dugang pahayag ni Kuya Gob sa mga hinabang gawas pa sa cash incentives gikan sa nasyonal nga kagamhanan.
Gipasalamatan pag-ayo ni 10th Infantry Division Commander Ruben Basiao ang mga opisyales sa probinsya labina ang “gobernador ng masa.”
“Gusto kung magpasalamat sa mga leaders ng province lalo na sa governor natin na napakasipag at saka napakaaktibo sa lahat ng mga aktibidades when it comes to peace and order, Governor Jubahib, governor ng masa. . Kini nga mga programa dili ni para sa amoa, . . para sa inyo mga FRs. .kamo ang maka-benefit niini.
Ginhanapan kayo ng mga oportunidad nga mabag-o ang kinabuhi ug maging productive citizens. . Dako na kaayo ang sakripisyo sa atong gobyerno para maayos na nato kining programa sa insurgency,” matod sa 10th ID commander.
Para sa Davao del Norte, desidido gayod si Kuya Gob nga matapos na ang insurhensya.
“Isip governor sa Davao del Norte naningkamot ko kuyog sa kasundalohan, kapolisan ug sa tanang national government agencies, sa atong LGU, nga humanon nato sa Davao del Norte ang insurhensya. Kay kung wa na’y gubot dako kaayo ang benepisyo sa katawhan nga nagpuyo kay mosulod na ang mga negosyante, molambo ang community. . Mao na nga padayon tang magtinabangay, maghiusa para sa kalamboan sa probinsya ug kalamboan sa tibuok nasod Pilipinas,” pasabot sa gobernador.
“Kumpleto” ang mga pasilidad sa Balay Panaghiusa alang sa 21 ka mga FRs.
