NAGKUGI pag-ayo ang Onse ka mga benepisyaryo sa KAwsa sa AGrikulturA ug PAnginabuhian sa barangaY kun KAAGAPAY samtang ilang napatungha ang sobra 11,102 kilos klase-klaseng gulay gikan sa pagsugod niini niadtong Hulyo 2020 hangtod Disyembre.
Si Gerhard E. Barcenas mao ang Barangay Extension Worker (BEW) nga naasayn sa Kapalong.
Kahinumduman nga tungod sa lockdown gumikan sa COVID-19 nga pandemya, gilunsad ni Gobernador Edwin “Kuya Gob” Jubahib ang KAAGAPAY niadtong Hunyo 16, 2020 nga nag-awhag sa mga residente sa probinsya nga mananom ug gulay diha sa tugkaran aron dunay makaon ug mabaligya ang sobra.
Dili magka-problema ang mga benepisyaryo pananglit dagha’g sobra ang produktong gulay kay mismo ang probinsyal nga panggamhanan pinaagi sa Davao del Norte Investment Promotion Center (DNIPC) maoy moadto sa lugar sa mga benepisyaryo pinaagi sa mga BEW nga naasayn sa maong lugar aron paliton ang ilang produkto bisan pa ug isa lang ka kilo. Ang presyo nakabase sa presyo-merkado sa Tagum City.
Sumala sa assessment sa KAAGAPAY Technical Working Group (TWG) nagtuyok-tuyok ang Dos Milyones nga seed capital sa DNIPC.
“Sa atong pag-assessed adunay on average Two Thousand pesos per farmer ang nahimong income for the past five months matag bulan. Sa among estimate kung imo nang i-multiply sa number of KAAGAPAY’s moabot siya ug balor kapin kun kulang two million. Kadto nang gi-rolling-rolling nga capital sa DNIPC. So kung imong valuehan for five months naa diay two million nga nagtuyok-tuyok gumikan sa pag-buy and sell nato ug gulay,” tug-an ni Dr. Romulo Tagalo, ang TWG head.
Sa tibuok probinsya adunay 1,144 ka mga benepisyaryo sa ‘KAAGAPAY gulay’ diha sa Tagum City, Panabo, Asuncion, Kapalong, New Corella, San Isidro, Sto. Tomas, Talaingod ug IGACOS nga gitabangan sa 34 ka mga BEWs.
Ang tapnatser Kapalong gisundan sa Panabo City ug Braulio E. Dujali nga naglangkob ingong top 3 KAAGAPAY gulay producers.
Gawas kang Gerhard Barcenas, nagkugi sab sila Jelhmar Tribunalo, Ray Narita, Joel Camagong, Nerry Besana, Edzel Silanga, Angelie Coriba, Crispino Tecson, Junvic Lura, Edgardo Manigo, Virginia Gamutan ug Alejandro Cano, Jr. ingong top 10 BEWs.
Samtang nakatutok sa gulay ang unang hugna sa KAAGAPAY, niining 2021 palapdan ni Kuya Gob Edwin Jubahib pinaagi sa dinaghan nga pagtanom ug kahoy sa pagtinabangay sa LGU, DavNor Provincial Environment Natural Resource Office (PENRO) ug Department of Labor and Employment (DOLE). “Nakasungkit” si Kuya Gob ug milyones nga pondo gikan sa Tulong Panghanapbuhay sa ating Disadvantaged/Displaced Workers (TUPAD) program aron makatrabaho sulod sa napulo ka adlaw ang mga gipiling benepisyaryo sa LGU.
Karong Hunyo, sugdan na sab sa KAAGAPAY ang poultry dispersal pinaagi’g Provincial Veterinary Office.
(Mismong mga personahe sa DNIPC ug Provincial Agriculturist Office (PAGRO) ang miadto sa Barangay Gabuyan, Tiburcia ug Semong sa Kapalong aron mapalit ang produktong gulay sa mga KAAGAPAY beneficiaries.)
