Subling gihataga'g gibug-aton ni Governor Edwin "Kuya Gob" Jubahib ang kakugi aron mahaw-as sa kalisod ug makab-ot ang mga damgo sa kinabuhi.

"Kinahanglan kita magkugi. Kita mismo motabang sa atong kaugalingon," maoy pagdasig ni Kuya Gob, atul sa paglusad sa TUPAD ug KAAGAPAY Para sa Pag-ayo sa Kinaiyahan Project sa Purok Molave, New Visayas, Sto. Tomas, Davao del Norte.

Butyag sa gobernador nga pinaagi sa iiyang pagkugi ug pagpursige nakab-ot niya ang kalampusan luyo sa kalisod nga iyang nasinati.

"Ang wala lang nako kalimti kung asa ko nagsugod," dugang sa gobernador.

Ang maong proyekto parte sa ikaduhang ang-ang sa DavNor KAAGAPAY program, nga ang dugang tumong karon mao ang paghatag panginabuhian ug pag-amping sa kinaiyahan, gawas sa pagsiguro sa saktong supply sa pagkaon ug pa-usbaw sa kita sa mga mag-uuma.

Dunay 2,700 ka mga benepisaryo ang maong programa sa probinsiya, nga gipunduhan sa DOLE ug ni Senator Villanueva sa kantidad nga P10 million.

Makadawat og P3,960 matag-usa ka benepisaryo sulod sa 10 ka adlaw nga pagtrabaho.

Kauban ni Kuya Gob sa maong okasyon sila Mayor Ernesto Evangelista, Board Member Engr. Franklin Gentiles, IPMR REP Board Member Ariel Macla, Vice Mayor Eric Estela, DNPPO Chief PCol. Rannie Hachuela, Provincial Enviroent and Natural Resources Officer Victor Billones, DOLE representative Dennis Tinambakan, Provincial Administrator Engr. Josie Jean Rabanos, and Provincial Agriculturist Jose Andamon.