Dako ang kalipay sa mga iskolar sa Davao del Norte Learning Institute (DNLI) sa gihimong pagtagad sa Knowledge Management Division ubos sa Provincial Information Communication and Knowledge Management Office (PICKMO) aron sa dili madugay ilang mahuman ang programang Master of Public Administration (MPA).

Na-alarma si Dr. Mervin Jay Suaybaguio, ang Department Head sa PICKMO ug kasamtangang nipuli isip Executive Director sa DNLI sa mubo kaayo nga "graduation rate" sa MPA program. Unom (6) pa lamang sa 153 enrolled MPA students gikan pa niadtong tuig 2015 ang nakahuman.

Sa pakigtambayayong sa Davao del Norte State College, gisugdan gyud dayon sa DNLI ang usa ka "Training cum Writeshop on Thesis Writing" isip pagpakusog sa tabang ngadto sa mga estudyante nga nagasulat na karon sa ilang thesis aron makagradwar. Upat kaadlaw ang igahin sa mga studyante nga anaa na sa Outline Defense (Pebrero 20, 27 ug Marso 6, 7, 2021) ug duha ka adlaw alang sa mga anaa na sa Final Defense (Pebrero 21 ug 28, 2021).

Ang DNLI usa ka institusyon sa Probinsyal nga Panggamhanan sa Davao del Norte nga nagahatag ug higayon sa mga opisyal ug empleyado sa lokal nga panggamhanan hangtod sa mga barangay nga makabaton ug pormal nga edukasyon sa mga programang Master of Public Administration, Bachelor of Public Administration, Bachelor of Science in Entrepreneurship ug Bachelor of Science in Disaster Resiliency and Management. Matud pa ni Lou Helen Tayone, Administrative Staff sa PICKMO, gikan sa pagkahimugso sa DNLI hangtod tuig 2020, aduna nay 6 nga nakahuman sa Master's program ug 343 sa Bachelor's ug Certificate programs (209 sa BPA, 61 sa Bachelor of Science in Midwifery ug 73 sa Certificate in Pre-School Education).

Pagpaklaro ni Dr. Ronald S. Decano sa mga parte sa Writing Chapter sa Thesis

 

 

 

 

DavNor News