GIPALAPDAN pa sa KAwsa sa AGrikultura ug PAnginabuhian sa barangaY (KAAGAPAY) pinaagi sa pag-apil sa sektor sa mga batan-on diha sa programa ni Gobernador Edwin “Kuya Gob” Jubahib alang sa seguridad sa pagkaon sa Davao del Norte.

Kahinumduman nga ang KAAGAPAY gilunsad niadtong Hunyo 2020 tungod sa COVID-19 nga pandemya nga nagbitbit og dakong hulga sa kahimtang sa panglawas lakip na ang kanihit sa pagkaon.

“Ang hugpong sa kabatan-onan apil na gayod sa KAAGAPAY. Gawas nga aduna gyo’y specific instruction si Kuya Gob, dapat iapil gyod ang mga batan-on kay lagsik. Ang mga batan-on naglangkob ug 30% sa kinatibuk-ang katawhan sa tibuok probinsya 15-30 anyos, dako kaayo na nga porciento,” rason ni Provincial Sports & Youth Development Office (PSYDO) department head Giovanni Gulanes nga nagbutyag nga kadaghanan sa mga batan-on nahilig sa dula sa internet, nabahin ang atensyon nga gusto ra ug lingaw-lingaw og walay “paki” sa hisgotanan sa panginabuhi.

Matod ni Leonilo Patayon sa DavNor Provincial Agriculturist Office (PAGRO) nga ang aberids edad sa mag-uuma maoy 58 anyos, nga nagpasabot lang nga ang mga batan-on wala mahilig sa pagpanguma.

Gibutyag dugang ni Gulanes nga sa tibuok probinsya dunay 14 naglungtad nga mga organisasyon sa mga batan-on og ang pag-apil kanila diha sa KAAGAPAY adunay lima ka tumong: 1- nga malangkit ang mga batan-on sa programang “seguridad sa pagkaon” sa probinsya; 2- nga maapil ang kalihokan sa agrikultura diha sa mga Plano ug Prorama (PPAs) sa mga batan-on ug sa mga organisasyon nga nagsuporta niini; 3- nga maka-establisar ug lapad nga alyansa sa mga organisasyon sa kabatan-onan ug sa mga grupo nga nagsuporta sa mga batan-on; 4- nga makatabang nga moubos ang aberids edad sa mga mag-uuma; ug, 5- aron maapresyar sa mga batan-on ang importanteng papel sa agrikultura diha sa ekonomiya.

Apil na niini ang 4H Club (Head, Heart, Hands & Health) sa mga batan-on ilawom sa Department of Agriculture.

Nagpulihanay’g pasabot ang DavNor KAAGAPAY Technical Working Group (TWG) sa mga Barangay Extension Workers (BEWs) nga gitawag ug KAAGAPAY staff aron maengganyo ang sektor sa kabatan-onan nga mo-apil sa kawsa ni Kuya Gob alang sa seguridad sa pagkaon.

Ang Davao del Norte maoy usa ka agrikultural nga probinsya og 70% sa iyang ekonomiya naka-base sa agrikultura.

Giila nga usa ka dakong hagit ang pagpaapil sa mga batan-on diha sa kalihokan sa pagpanguma.

 

 

 

 

 

DavNor News