NAGPATABANG ang mga tigtanom og gulay sa Barangay Gupitan, Kapalong, Davao del Norte sa KAwsa sa AGrikulturA ug PAnginabuhian sa barangaY (KAAGAPAY) aron mogaan ang ilang problema-- ang dakong gasto sa pagbaligya sa produkto.

Tapos sa community organizing orientation Huwebes, Marso 11, gisaysay pinaagi ni Gupitan Purok Centro chairwoman Teresita dela Cruz dili lang problema sa gastos lakip na ang “bun-og” nga gulay gumikan sa pagkarga.

Gumikan sa bun-og, menosan sa kumprador ug singko kilos ang timbang sa isa ka sako; aberids isa ka sako nabawas sa napulo nga ibaligya. Sobra 33 kilometros ang gilay-on sa Gupitan og Kapalong nga dili tanan karsada sementado.

“Okey naman gyod mi nunca ibalik pa namo sa amoa dire nga layo naman. . Tag singko kilos, so ang napulo ka sako isa gyod na ang less ana, siyam lang ang ilang kwentada. Okey na lang mi nunca ibalik pa namo nga gihagoan naman namo,” matod ni chairwoman dela Cruz.

Sa isa ka biyahe sa “habal-habal” motorsiklo, P500 ang plete og gikinahanglan ang duha ka motorsiklo kargahan sa napulo ka sakong talong o’ bisan unsang klaseng gulayon.

“Duha ka motor ang mokarga ana; isa ka libo. Lahi ra jud og naay mag-kumpra, naay moanhi dire,” dugang saysay sa purok lider.

Hinuon positibo kaayo ang panglantaw sa mga maggu-gulay sanglit matod nila “walay utang sa gulay lahi sa negosyo ug gidasig ang uban nga magkugi. Mihatag pa gani ug testimonya ang purok lider.

“Negosyo? Naa pa’y utang, ang gulay walay utang. . . Mao na akong gina-encourage parte og gulay. Kay kung ang tao dire mananom, dili gyod maglisod. Kay kung pang-asin, pang-vetsin, panud-an solved kaayo. . . Sa tinuod lang sa wa pa mi nag-gulayan sa una, cacao lang amoang gi-estudyohan nga panginabuhi. Lisod gyod, pait kaayo. Sa dihang nag-gulayan naka-saved mi. Ang amoang cacao savings na. Ang amoang gulay maoy magamit dayon. Nakapalit pa mi’g yuta, nakapalit mi’g lote, naka-balay mi tungod lang sa gulay. Mao nang gusto jud ko’g gulay.”

Andam sab nga magbuhi ug KAAGAPAY manok ang Purok Centro pasalig sa chairwoman sabay sa Gulayan sa Barangay.

“Naa mi area diha nga wala gyod nagamit, bakante. Mao na among gi-planohan kay ang Gulayan sa Barangay gamay ra man. Kung mosugot ang barangay mao na’y amoang himoon sa gulayan. Mao na’y akong gisugyot kay kanang gulay wa gyo’y tawong maglisod basta mag-gulayan. Kay anytime kwarta jud. Moduol ra ang mopalit. Syempre makapalit dayon ka’g sud-an, asin or kape ba. . . Ang kugi lang gyod, dili man tanan mobarato, naa man pod momahal,” padayong saysay ni dela Cruz.

Gawas sa iya mismong purok, misaad ang Purok Centro chairwoman nga awhagon ang silingan Purok Matol nga mag-gulayan og mag-manokan tungod sa daghang tabunok bakanteng yuta dayon mag-asosasyon sila aron maengganyo ang mga kumprador nga mosubida.