ILAWOM sa manggahan, seryoso nga namati ang mga Purok Leaders sa Barangay Minda unsaon pag-organisar sa ilang kaugalingon aron mahimong benepisyaryo sa “KAAGAPAY free-range chicken growership.” Ang Minda maoy usa sa suok nga barangay sa Carmen, Davao del Norte nga kinahanglan nga moagi sa checkpoint sa TADECO una pa makaabot sa maong dapit.

Ang KAAGAPAY maoy usa ka programa sa seguridad sa pagkaon sa probinsya nga gilunsad ni Gobernador Edwin (Kuya Gob) Jubahib) aron makontrolar ang kawad-on ug ang kanihit sa pagkaon gumikan sa COVID-19 nga pandemya. Niadtong Hulyo 2020, una nang gilunsad ang pagtanom og gulayon diha sa matag panimalay, dayon ang pagpananom sa liboan ka mga kahoy alang sa kinaiyahan og gisunod ang pagbuhi og mga manok.

Apil sa gisum-ok hilit nga barangay sa KAAGAPAY ang Consolacion, Panabo City. Sanglit ang mga Purok Leaders adunay nauna nga eskedyul sa barangay planning, ang mga miembro sa lima ka purok maoy mihulip ug atentibong naminaw sa orientation nga gipahigayon Huwebes, Marso 25.

Suportado gayod ni Kapitan Pablito Tocmo nga mihulat gyod sa KAAGAPAY orientation team una pa kini miadto alang sa ilang barangay planning.