Duha ka ambulansya ug usa ka transport vehicle ang pormal nga gitunol sa Probinsyal nga Panggamhanan sa Davao del Norte sa panguna ni Gobernador Edwin “Kuya Gob” Jubahib ngadto sa Davao del Norte Hospital (DDNH) - IGACOS Zone, Luntiang Paraiso Regional Rehabilitation Center (LPRRC), ug Blood Center atol sa blessing ug turn over ceremony nga gipahigayon sa Provincial Capitol Grounds.

Naabot atong Marso 2021 ang mga ambulansya ug transport vehicle nga gikan sa pagpaningkamot ug sa badyet nga gigahin sa probinsyal nga panggamhanan nga nagkantidad og kapin kon kulang 4.6 million pesos.

Matod pa ni Provincial Economic Enterprise and Development Office (PEEDO) Department Head Dennis Devilleres nga mahinungdanon ang mamahimong kontribusyon sa mga naabot nga ambulansya tungod masolusyonan niini ang problema sa probinsyal nga mga hospital ilabi na sa pag-abot sa standard na mga ekwipo nga gipatuman sa Department of Health (DOH).

“Daghan gayod kaayong problema nga nakita number one sa hospital nato, requirement man sa DOH nga dapat naa ta’y ambulance to transport patients gikan sa atong hospital paingon didto sa referral hospital. Over the years, naa ta’y mga ambulansya pero ang uban wala na g’yod kay guba na kay murag 12 years old or overused na ug nag sige na’g kaguba. Unya inig assess sa DOH, dili na g’yod ta makapasar. There were clamor sa atong mga hospitals karon to provide equipment nga makapasa sa standard sa DOH. Dugay dugay na nilang gipangayo. It’s only now sa time ni Kuya Gob nga natubag ang ilahang mga yangongo,” sulti ni PEEDO Head Devilleres.

Misulti sab sa iyang obserbasyon ang gobernador nga sa panahon nga adunay emerhensiya nga mahitabo sa kinabuhi sa tawo, dako kaayo og tabang ang mga ambulansya sa pagresponde ug paghatag og serbisyo sa mga katawhan maong naningkamot ang iyang administrasyon nga mahatag ang mga sakyanan sa mga nagkinahanglan nga ospital.

“Tungod kay nakita nato nga usa g’yod sa dako nga pagkinahanglan especially if adunay emergency nahitabo sa kinabuhi sa isa ka tawo, so ato ng gipaningkamotan kuyog usab sa pagpaningkamot sa tanang PG Heads ug usab sa atong assigned nga department head sa PEEDO nga ma provide nato ning maong ambulance so nakita nato nga kung anaa ang diwa sa pagpaningkamot ug diwa sa tinud-anay ug kinasing-kasing nga pagserbisyo, ato g’yod diay makab-ot ang atong mga gipangandoy. Kini atong bag-ong ambulance karon para ni sa atong Luntiang Paraiso, para sa atong Blood Bank ug sa IGACOS District Hospital so maghatag kini og serbisyo nga libre. Walay obligasyon ang manginahanglan niini hinaot nga para sa mga operator nga ampingan ning maong ambulance kay dili lalim ang pagkuha og butang sama niining ambulance para nga magserbisyo sa katawhan ug kinahanglan nato tanan nanginahanglan nga atong hatagan sa saktong serbisyo,” ingon ni Kuya Gob.

Mapasalamaton sab si Dr. Joseph Nilo Parreñas, ang Chief of Hospital sa LPRRC, kay Kuya Gob tungod nakadawat na sila sa ambulansya nga pila ka tuig na nilang gipangandoy. Dugang pa niya nga daghang problema ang masolusyonan sa pag-abot sa maong ambulansya.

“Perting daghana ang problema nga masolusyonan ani. Actually we really requested for this ambulance way way back before even before this administration pero ang nahitabo, karon ra g’yod ni siya na realize ug dako g’yod akond pagpasalamat ilabi na kay Gob ug sa atong department head si sir Dennis Devilleres,” pagtapos ni LPRRC COH Dr. Parreñas.

 

 

 

 

 

DavNor News