PAREHAS sa ubang mga purok leaders sa Davao del Norte, andam sab nila nga batokan ang kanihit sa pagkaon resulta sa COVID-19 nga pandemya.
Sabay-sabay nga gipatugbaw sa mga purok leaders sa barangay Magatos, Asuncion ang tema-singgit sa KAwsa sa AGrikultura ug PAnginabuhian sa barangaY kun KAAGAPAY atol sa Community Organizing orientation Byernes, Abril 16.
“Kagutom batokan, mag-manokan sa 2021,” ang hiniusang tingog sa mga Purok Leaders sa Magatos dayon isa sa ilang mga kamot nga andam silang mobuhi og manok alang sa dugang kinitaan.
Kahinumduman nga gumikan sa COVID-19 halos tibuok kalibotan nag “lockdown” apil na ang Davao del Norte nga miresulta sa kalisod og kanihit sa pagkaon. Mihimo’g lakang si Gobernador Edwin “Kuya Gob” Jubahib ug gilunsad ang programang KAAGAPAY Hulyo 2020 mismo sa barangay Magatos.
Ang KAAGAPAY adunay tulo ka bahin (component). Una niini ang pagtanom og gulayon ingong short-term solusyon, dayon pagtanom og mga kahoy (reforestation) hangtod niadtong Pebrero 2021 nga magtabang pag-ayo sa kinaiyahan ug ang pagbuhi og manok aron adunay dugang kinitaan.
“Dugang panginabuhian, dugang pagkaon ug balik sa kinaiyahan, mao ni ang tumong sa KAAGAPAY,” matod ni Dr. Nilo Parreñas nga maoy mihatod sa mensahe ni Kuya Gob.
Bisan pa kung ang ubang purok sa barangay Magatos nagkaproblema sa luna nga butangan sa komunal nga kulongan sa manok apan desidido sila nga mangita’g solusyon aron sab sila makabuhi sa mga KAAGAPAY chickens nga ipanghatag ni Kuya Gob.
