HANGTOD Abril 19, miabot na og saysenta’y syete (67) ka mga puroks gikan sa pito ka mga barangays ang nagsumiter sa mga dokumento aron mahimong KAAGAPAY People’s Organization (PO) samtang pito sab niini ang nakahimo na og kulongan sa manok.

Ang KAAGAPAY kun KAwsa sa AGrikulturA ug PAnginabuhian sa barangaY maoy food-sufficiency program sa administrasyon ni Gobernador Edwin “Kuya Gob” Jubahib aron mapugngan ang kanihit sa pagkaon gumikan sa COVID-19 nga pandemya. Kini nag-pokus una sa pagtanom og gulayon alang sa pangmadalian (short-term) nga solusyon, pagtanom og mga kahoy (reforestation) og pagpamuhi og manok ilawom sa “growership” nga sistema.

Aron molahutay ang pagbuhi sa manok, ang mga interesadong benepisyaryo gikan sa usa ka purok magporma og People’s Organization (PO) nga dunay 15 hangtod 30 ka miembro. Ang matag usa libreng hatagan og tig-lima ka manok nga ilang padakoon sulod sa usa’g tunga hangtod duha ka bulan diha sa ilahang komon nga kulongan. Alang sa primerong hugna sa chicken dispersal, ang feeds iapil sab og padala.

Paliton og balik sa probinsya ang dagko na nga manok og ilisan na sab og laing tig-lima ang matag miembro. Ibawas hinuon ang orihinal nga kabug-aton sa manok og ang bayaran lang sa probinsya ang gitubo sa manok.

Tapnatser ang P1 Katipunan Kap KAAGAPAY Workers Association nga nahimong PO gikan sa Katipunan, Kapalong samtang pinaka-unang nakahimo og kulongan sa manok ang Purok 5A sa New Casay og Purok 2A sa Cabay-angan sa Braulio E. Dujali.

Padayong gi-evaluate sa DavNor Cooperative Investment Development Division ang gisumiter nga mga dokumento kung aduna ba kini kakulangan.

 

 

 

DavNor News