Malipayon nga gidawat ni Kuya Gov. Edwin I. Jubahib ang plaque of recognition para sa Probinsya sa Davao del Norte nga giila isip OVERALL MOST COMPETITIVE PROVINCE sa tibuok Rehiyon Onse, kaganihang hapon, Abril 20, didto mismo sa iyang opisina sa kapitolyo.
Ang pasidungog nakuha sa probinsya tungod kini ang dunay pinakataas nga weighted average sa overall scores sa mga dakbayan ug lungsod nga nahisakop niini sumala sa Cities and Municipalities Competitive Index nga ang basehan mao ang populasyon ug income. Gi-anunsyo ang mga mananaog niadtong Pebrero ning tuiga pinaagi sa Zoom Meeting sa gipatigayon nga 4th Davao Region Competitiveness Award para sa tuig 2020. Tungod sa pandemya, gi-delantar ang paghatag sa mga plaque.
Ang plaque personal nga gitunol ni Provincial Director Romeo L. Castañaga sa Department of Trade and Industry – Davao del Norte kauban ang mga personahe sa iyang buhatan.
Kahinumduman nga nasungkit sa Davao del Norte ang ikaduhang pwesto sa National Level nga dunay 50.39 weighted average sunod sa Probinsya sa Rizal nga nakuha ang 51.53. Matud pa ni Provincial Administrator Engr. Josie Jean Rabanoz, dako kaayo ni nga kalampusan kay nisaka ug upat ka ang-ang ang ranking sa probinsya gikan sa 6th place para sa tuig 2019.
Sa Rehiyon Onse, kanunay nga numero uno ang Davao del Norte. Karong tuiga, nakuha sa Davao de Oro ang ikaduhang pwesto ug Davao Oriental alang sa ikatulo.
