Usa ka supresa ang gidala sa Department of Labor and Employment (DOLE) niadtong Martes sa hapon, Abril 20, sa Probinsya sa Davao del Norte. Bitbit sa grupo nga gilangkoban sa Provincial ug Regional Field Offices sa maong buhatan ang cheke nga nagkangtidad ug Php 4,747,216 isip dugang pondo para sa implementasyon sa Tulong Panghanapbuhay sa Ating Disadvantaged / Displaced Workers o TUPAD.

Kahinumduman nga niadtong Enero karong tuiga, nadawat sa probinsya ang Php 10,683,060 alang sa TUPAD diin 2,645 ka mga Dabaonon ang nakabenepisyo niini. Sila nagtrabaho sulod sa napulo ka adlaw isip dugang kaagapay alang sa KAwsa sa AGrikulturA ug PAnginabuhian sa barangaY kon DavNor KAAGAPAY Program. Tumong niini nga pakusgan ang agricultural production ug reforestation sa probinsya. Gani, 62,940 seedlings sa kahoy ang natanum sa mga benepisyaryo isip lakang aron mabalik ang katahom sa kinaiyahan.

Malipayon nga gidawat ni Kuya Gov ang bag-ong pondo nga gamiton aron mapadayon ang mga kalihokan sa DavNor KAAGAPAY. Mao usab ang gibati sa mga personahe sa DOLE kay matud pa nila ang Davao del Norte ang usa sa pinakamaayo ug implementasyon sa TUPAD hinungdan nga makalaom kini ug dugang pa nga pondo.

Anaa mismo sa maong okasyon si Atty. Jason Balais (Director II, DOLE-XI), Provincial Director Angelina Talingting (DOLE-DavNor) ug Community Facilitator Dave Andrei Villegas. Kauban ni Kuya Gob sa pagrepresenta sa probinsyal nga panggamhanan sila Provincial Administrator Engr. Josie Jean Rabanoz ug Assistant Provincial Administrator for Operations Engr. Ma. Hazel Zafra.

 

 

 

DavNor News