Excellent!

Kini ang pagdayeg sa Philippine Drug Enforcement Agency (PDEA) XI Assistant Regional Director sa gihimong Balay Silangan sa Davao del Norte, ang dapit-silongan sa mga drug offenders aron mareporma ug mahimong produktibong miembro sa komunidad.

“Itong initiative ni Governor very nice, very good, excellent,” matod ni PDEA XI ARD Mario Ramos atol sa pag-abli sa bag-ong pasilidad nga anaa ra gipahimutang sulod sa DavNor Capitol compound.

Midugang ang PDEA ARD XI nga kini ang iyang pag-assess sa inisyatibo sa administrasyon ni Gobernador Edwin “Kuya Gob” Jubahib tungod kay gihimo ang imprastruktura para gyod sa maong katuyoan.

“Ito personal ko, kung ikukumpara ko doon sa mga naging experience ko since 2013. Napakaganda nitong ginawa nila. Hindi ko maihintulad sa ibang probinsya pero ito ginawa “for the purpose.” Yung budget ginawa for the purpose, very specific yung kanyang inisyatibo,” matod ni ARD Ramos.

Ang Balay Silangan gitukod sa administrasyon ni Gobernador Edwin “Kuya Gob” Jubahib alang sa mga drug offenders (drug pusher). Inisyal kining gibadyetan og P5 milyones ug dugang singko milyones alang niining tuiga. Gawas sa mga reformation center alang drug offenders, nagtukod sab si Kuya Gob og “Balay Panaghiusa” ingong reformation center sa misurender kanhi mga rebelde nga giinagurahan niadtong Enero 2021.

Sa pagkakaron, upat (4) na ka mga pasilidad nga gipadagan og gimentinar sa probinsya ilawom sa pagdumala sa Provincial Social Welfare and Development Office kun PSWDO—Balay Silangan, Balay Panaghiusa, Women Development Center ug Bahay Pag-asa nga kining tulo nahimutang sa lungsod sa New Corella.

Ang Dangerous Drugs Board Regulation Number 2 series of 2018 nagmando sa matag LGU nga magtukod og Balay Silangan alang sa misurender nga drug pusher ug niadtong mipahimulos sa “plea bargaining” nga kahikayan sa korte.