Natagamtaman ug nakab-ot na gayod sa 16 ka mga Former Rebels (FRs) ang dugay na nilang gipangandoy nga tinud-anay nga serbisyo, demokrasya, ug kadaogan pinaagi sa tabang gikan sa probinsyal nga panggamhanan sa Davao del Norte, Nasyonal nga panggamhanan, ug uban pang mga ahensiya sa gobyerno nga nagkahiusa aron mareporma ug mabansay sila sulod sa 3 ka bulan sa Balay Panaghiusa.
Malatngonon ang gipahigayong Turn-over Ceremony sa mga ECLIP beneficiaries ug kanhing rebelde nga andam na mobalik sa ilang nagkada-iyang mga komunidad bitbit ang kabag-ohan ug suporta gikan sa gobyerno.
Holistic ang approach sa pagbansay sa mga FRs nga nahimong posible sa tabang sa Armed Forces of the Philippines (AFP), Philippine National Police (PNP), Technical Education and Skills Development Authority (TESDA), Department of Education (DepEd), Provincial Social Welfare and Development Office (PSWDO), Department of Labor and Employment (DOLE), ug mga pastors.
Matod pa sa testimonya sa usa ka FR, dako kaayo ang kalahian sa ilahang kinabuhi panahon nga anaa pa sila sa gapos sa New People’s Army (NPA) kumpara sa ilahang kinabuhi pagbalik nila sa sabakan sa gobyerno, tungod wala gayod silay katungod ug demokrasya sulod sa kalihokan.
“Dili g’yod maayo ang doktrina sa kalihokan kay unang gipawala sa kalihokan kay ang pagtuo sa Ginoo. Ilabina sa mga babaye sa kalihokan, gipahimuslan, wala gihatagan ug katungod, walay demokrasya ang mga kababayen-an didto. Dili sab mi hatagan og katungod na mubisita sa among pamilya ug kung mangayo mi’g suporta sa partido dili g’yod nila matubag. Pero pagbalik -loob namo sa gobyerno, diri g’yod namo nakab-ot ang amoang gipangyo, ang amoang kadaugan. Pasalamat mi sa gobyerno bisan pa man sauna nga nabuhat namong kasayupanan, gidawat gihapon mi. Sinsero g’yod diay mutabang ang gobyerno sa mga FRs ,” pagbutyag sa kanhing rebelde.
Ang 16 ka mga FRs nga pormal nga gi-turnover nag gikan sa munisipyo sa New Corella, Davao del Norte, Kapalong, Davao del Norte, Montevista, Davao de Oro, Monkayo, Davao de Oro, Loreto, Agusan del Sur, Davao City, ug sa Laak, Davao de Oro.
Misaad sab sila Kapalong Mayor Maria Theresa Timbol ug New Corella Vice-Mayor Pedro Lagumbay, Jr. nga andam mutabang ang Local Government Unit (LGU) ngadto sa mga FRs busa aduna nay gi-andam nga pondo para sa mga livelihood programs nga mamahimo nilang maambit sa ilang pag-uli.
Aduna sab silay madawat nga P10,000 cash assistance gikan sa probinsyal nga panggamhanan, P20,000 gikan sa DSWD, P65,000 gikan sa nasyonal nga panggamhanan ug P6,000 gikan sa DOLE-TUPAD. Ang National Housing Authority (NHA) naghatag sab og balay sa freedom residences nga nahimutang sa Cuambogan, Tagum City nga nagkantidad og P450,000 grant kon asa anaa nay 10 nga interestedo mag avail niini.
Mihangyo sab si 10th ID Commander MGen. Ernesto Torres, Jr. nga dili sayangan tanang nakat-unan nila sa Balay Panaghiusa apan makatabang kini sa ilahang pagbalik sa komunidad.
“Lubos kaming natutuwa at naging katotohanan na itong programa ng de-radicalization at batid po namin na nag undergo rin sila ng alternative learning system, skills and livelihood development and a host of other training pa na provided ng ating gobyerno. Sana po wag natin sayangin ang ating natutunan at i-apply natin pagbalik natin sa mainstream society. Wag po sana natin sayangin ang pagkakataong magkaroon muli ng dignidad sa buhay , earn for our own living, at mabigyan ng kinabukasan yung baby. At wag na natin hayaan pang daanan nila yung pinakamahirap na dinaanan natin,” sulti ni MGen. Torres, Jr.
Gitapos sab ni Governor Edwin “Kuya Gob” Jubahib ang seremonyas pinaagi sa pag-awhag sa tanan nga magkahiusa aron makab-ot ang ginapangandoy nga paglambo.
“Alang sa mga FRs siguro karon inyoha ng napamatud-an kung unsa ka maayo ang atong gobyerno sukwahi sa tanang mga testimony nga diha pa mo sa kabukiran. Dugay nako nangandoy nga mahuman na ning insurgency dili lang sa Davao del Norte, kundili tibuok Pilipinas. Kay unsa may atong angay awayan nga parehas raman tang Pilipino ug parehas ta nga tag-iya ani atong nasud nga Pilipinas ug angay lang nga unta mao ni atong mahalon ug tagaan og ensaktong pagtagad maong dili ta angay mag giyera. Bisag unsa man klase sa relihiyon, Muslim ka man, Kristiyano, ug bisag unsa man, ang importante, magsinabtanay tan tanan. Kay kung anaa ang pagsinabtanay ug paghiusa dali nato makab-ot ang kalamboan nga atong gipangandoy,” sulti ni Kuya Gob.
