Isip tubag sa dugay nang yangongo sa mga Indigenous People nga makabaton og disenteng tunghaan alang sa ilang mga kabataan, gi-turnover na sa Probinsyal nga Kagamhanan sa Davao del Norte ngadto sa LGU Kapalong ang bag-ong tukod nga 2-classroom unit building sa Moling Elementary School ug Tawinian Elementary School ug 1-classroom unit building sa Kawayan Elementary School nga puros nahimutang sa Brgy. Gupitan, Kapalong, niadtong Mayo 6-7, 2021.

Tulo lamang kini sa lima ka mga tunghaan nga planong tabangan ni Gobernador Edwin “Kuya Gob” Jubahib diin gigahina’g P500K kada usa. Mosulod og kapin 40 ka mga bata ang matag lawak.

Malipayong gidawat sa mga ginikanan ug magtutudlo ang maong gambalay tungod kay makalingkawas na sila sa grabeng pag-antos sa pipila ka tuig nga binaktasay sa 10 ka kilometrong dalan padulong sa pinakaduol nga tunghaan. Karon, duol na lang kaayo ug duna pay atop nga masilongan.

Gawas niini, nakadawat sab og usa ka tangke saluranan sa ulan ang Tawinian Elementary School nga magamit sa tibuok komunidad. Kini gidonar sa Jose Rizal Heritage Fund nga nakabase sa Switzerland.

 

 

 

 

 

DavNor News