Tungod sa nasinating Signal 1 ug 2 sa probinsya dala sa tropical storm “Crising” ug aron mahimong luwas ang katawhan sa posibleng epekto niini, nagpagawas og opisyal nga abiso ang probinsyal nga kagamhanan ngadto sa mga opisina sa kapitolyo ug sa mga lungsod kagahapong adlawa.

Gawas sa frontline services, mapailawom sa Work from Home ang mga empleyado sa kapitolio, mga pampublikong opisina, mga pampublikong eskwelahan sa primary og secondary, lakip na ang mga nasyonal nga mga ahensiya sugod karong adlawa, Mayo 14 hangtud ugma, Mayo 15, 2021 o hangtud kanus-a mabalik sa normal ang panahon.

Nitubag gilayon ang pipila ka mga LGUs sa susamang working arrangement o suspension sa klase ug trabahao pinaagi sa pagpost sa ilang mga social media pages. Work from Home ang Munisipyo sa Sto. Tomas, San Isidro ug Carmen. Suspended ang trabaho sa LGU Tagum City, Panabo City, Island Garden City of Samal ug Munisipyo sa Braulio E. Dujali.

Ang Munisipyo sa New Corella, dugay ng nagpagawas og anunsiyo nga sirado ang munisipyo karong adlawa tungod sa pagahimoong decontamination activity batok sa covid-19 bayrus. Gimandoan ang tanang mga opisina, mapribado o pampubliko nga mag-Work from Home gihapon sama sa ubang mga LGUs. Mag-abli ilang buhatan sa Lunes, Mayo 17.

Samtang ang Asuncion ug Kapalong, tungod sa normal nga lebel sa katubigan sa tibuok probinsya labi na sa duol nga kasapaan sa ilang lugar, magpadayon ang ilang trabaho sa opisina karong adlawa.

Ang mga pribadong tunghaan og mga opisina, magdepende ang ilang trabaho karon sumala sa desisyon sa ilang management apan ang IGaCoS kanselado usab ang klase sa mga pribadong tunghaan sa tanang lebel.

Gipasiguro sa mga LGUs nga kanunay'ng andam ug nakaalerto ang ilang local disaster team sa bisan unsang emerhensiya.

Wala pay gipagawas nga abiso ang Munisipyo sa Talaingod hantud niining pagsulat.