SUGDAN na ang pag-apod-apod sa mga manok sa KAwsa sa AGrikulturA ug PAnginabuhian sa barangaY kun KAAGAPAY ugma, Mayo 18.

Moabot og 1,215 ka mga manok ang itunol ni Gobernador Edwin “Kuya Gob” Jubahib alang sa 14 ka mga People’s Organization sa barangays Katipunan, Consolacion, Malativas, Nanyo, Southern Davao, Quezon ug San Francisco sa Panabo City.

Ang KAAGAPAY maoy programa ni Kuya Gob alang sa seguridad sa pagkaon (food security) sa probinsya gumikan sa gisagubang nga problema dala sa COVID-19 nga pandemya. Kini gilangkoban sa pagtanom og mga gulayon, pagtanom og mga kahoy (reforestation) ug ang pagbuhi og kahayopan labi na sa manok.

Gumikan sa maayong tumong og sa naani maayong resulta diha sa pagtanom og gulayon, ang KAAGAPAY gihatagan og P10.5M nga pondo sa Department of Labor and Employment (DOLE) pinaagi sa programang Tulong Panghanapbuhay sa Ating Disadvantaged/Displaced Workers kun TUPAD. Gisundan pa kini og laing P4.7M ug gihulat na sab ang laing sobra P10M kung ma-liquidate na ang naunang gi-release nga pondo.

Sa “final briefing” kagahapon alang sa KAAGAPAY chicken dispersal, tentative eskedyul mosunod sa Panabo City ang Asuncion uban ang fingerlings pagka Mayo 20, IGaCoS (Mayo 25), New Corella (Mayo 27), Tagum City (Mayo 28), Hunyo 8 para sa Carmen, Sto Tomas ug B. E. Dujali; Hunyo 10, San Isidro ug sa Hunyo 15 alang sa lungsod sa Kapalong. Gawas sa mga manok, ang dispersal may “pakapin” nga libreng feeds.

Makadawat pa gyod ang mga KAAGAPAY beneficiaries sa payout gikan sa TUPAD (DOLE) atol sa dispersal gawas sa hatag nga manok og libreng feeds.