Dako nga lakang alang sa probinsya sa Davao del Norte ang vaccination sa mga lider sa probinsyal nga panggamhanan tungod sila ang mahimong ehemplo sa ilahang mga nasakupan nga dili magduha-duha sa pagdawat og bakuna aron mas mapadali ang pag-angkon sa Herd Immunity o population immunity ug aron ma protektahan sab sila batok sa Covid-19 virus isip mga public officials ug department heads nga kanunay ug direktang naga-atubang og lain-laing mga tawo.
Human nabakunahan ang mga healthcare workers sugod Marso 2021, gisugdan na ang vaccination alang sa mga opisyales sa Sangguniang Panlalawigan, mga alkalde sa Local Government Units (LGUs), ug mga Department Heads sa kapitolyo nga gikonsidera nga frontliners sa national vaccination operation center. Target sab sa nasyonal nga panggamhanan nga mabakunahan ang 70% sa populasyon pag-abot sa Nobyembre 23,2021.
Matod pa ni Department of Health (DOH) XI Regional Director Anabelle Yumang, adunay mando nga bakunahan ang mga local chief executives kay apil sila sa A1.5 nga priority group sa vaccination ug usa ni ka pamaagi nga matabangan ug masuportahan nila ang vaccination campaign sa nasyonal nga panggamhanan pinaagi sa pagpakita sa mga katawhan nga luwas ang bakuna nga ihatag.
“Naa tay mando nga atong mayors, governors, kinahanglan mabakunahan and they belong to A1.5 group. Kung makita sa mga katawhan nga nagpabakuna ang mga local chief executives, dako kaayo ni siya nga tabang nga mapakita sa katawhan na ang bakuna na gihatag sa ilaha luwas sila. Safe ang vaccine regardless unsa ang bakuna nga madawat karon, nagpaila kini nga nagsuporta sab atong local chief executives sa atong vaccination campaign for covid-19. Inyong mga Department Heads ato pud silang tan-awon kung na belong sila sa atong grupo sa senior citizens or sa 18-59 years old nga with commorbidity. Pasabot niini priority group pa gihapon sila,” pagpasabot ni DOH Regional Director Yumang.
Dugang pa ni DOH Regional Director Yumang, dili dapat mag kompyansa ug gikinahanglan gihapon magsunod sa health protocols bisan pa’g humana nabakunahan.
“Akong message sa mga katawhan, naa naman tay mga bakuna apan dili gihapon ta mag kompyansa. Balik gihapon ta sa minimum public health standard so buot pasabot niini, kinahanglan gihapon ang pagsuot sa face mask and face shield kung asa ka mag-adto, ang pag distansya og usa ka metro, ug ang pagpanghugas sa atong kamot frequently ug ang pagtuo sa ensaktong impormasyon,” pagtapos ni DOH Regional Director Yumang.
Gipadayag sab ni Carmen Municipal Mayor Virginia Perandos iyang pagbati pagkahuman siya nabakunahan uban ang paglaom nga pinaagi sa iyang pagpabakuna, ma-awhag ang ubang Dabaonon ilabi na ang musunuray nga priority group nga modawat sa vaccine.
“Ang pagpa inject nako karon mura ra og nagpa Pneumococcal vaccine ko, nagpa anti-flu ko nga vaccine. Pareho ra g’yod unya slight numb ra g’yod akong gibati. Okay ra kaayo akong first dose sa vaccine. Naga hope g’yod ko nga there will be a positive impact on this vaccination of mine kay di man g’yod kalikayan karon daghan na sad issues about vaccine but I as the Municipal Mayor, I really have to influence and have to motivate our people especially the next group, the senior citizens group to undergo vaccination kay this is for our safety ug positibo g’yod ko nga daghan ang musunod kanako. Matod sa atong DOH officials, once vaccinated, it’s not a guarantee nga dili nata mataptan sa Covid-19 pero very minimal ug mild lang g’yod og og mataptan ta,” ingon sa alkalde.
Gipasabot sab ni Provincial Administrator Engr. Josie Jean Rabanoz nga kaugalingong “free will” sa mga Department Heads ang magpabakuna. Naga-dahom pud sila nga mga lider sa panguna ni Gobernador Edwin “Kuya Gob” Jubahib nga mabakunahan sab ang workforce sa probinsyal nga panggamhanan aron dunay panagang kontra COVID-19 ug mapadayon ang paghatod og serbisyo sa publiko.
“We just encouraged the Department Heads nga magpa vaccine, wala sila gipugos free will nila pero at least nakita nila and na appreciate ang importance sa vaccination at the same time secured ka. Even our governor positive na g’yod siya nga dako ang impact niini sa probinsya. Karon sabay sila ni Congressman Dujali magpa-vaccine sila so positive siya in a sense nga makita sa tawo nga dili jud angay kahadlokan kung magpa vaccinate ka sa Covid-19. Kung pwede pa lang gani gusto ni Kuya GoB as soon as possible ang workforce sa provincial capitol fully-vaccinated na dapat o dili man jud 100% kay naa man uban nga dili mapugos pero at least mag target ta’g 80% of the workforce okay na kaayo na for the provincial government,” sulti ni Engr. Rabanoz.
Sa pagkakaron adunay kinatibuk-ang 371,730 nga Covid-19 vaccine doses nga nadawat sa Davao del Norte, 75,552 ka healthcare workers ang nakadawat og 1st dose sa bakuna ug 27,429 ang nakadawat sa 2nd dose. Nagsugod na sab og pagbakuna sa A2 nga priority group nga mao ang senior citizens ug adunay 8,666 nga nabakunahan na.
