Naaprobahan na ang ordinansa nga maghatag pahalipay sa mga parent leaders sa dakbayan. Ubos sa City Ordinance 913 series of 2019 nakalatid ang paghatag binulan nga honorarium ngadto kanila, pagpahigayon og tinuig nga symposium ug pag-ila sa ilang mga paningkamot ug ang paggahin og pondo alang niini.

Sumala ni City Action Team Leader Jaymark D. Moreno, DSWD XI Project Development Officer II, nga nakita nila ang kahago sa mga parent leaders aron maatiman ang ilang kaubang miyembro. Wala ni silay allowance, kung unsay gidawat sa uban, mao sab ilang gidawat. Sa pag-aprobar sa ordinansa, matabangan sila bisa’g gamay.

Dili moubos sa P1.5M nga badyet sa tibuok tuig ang nasang-at sa konseho sa panguna ni Vice Mayor Eva Lorraine Estabillo, nga maglangkob sa binulan nga tag-P500 nga honorarium alang sa 237 nga natalang parent leaders sa siyudad ug pagpatigayon sa Pasasalamat program matag Disyembre diin ilang madawat ang mga tokens, sertipiko ug uban pang mga gasa. Lauman ang P2,000 suma total nga payout, gikan Enero hangtud Abril, ilang makobra karong bulan sa Mayo.

Sa laing bahin, nagpahimangno usab si CAT Leader Moreno sa mga Pantawid Pamilyang Pilipino Program (4Ps) beneficiaries nga dili iprenda ilang mga cash card. Ilawom sa City Ordinance 881 series of 2019, ipahamtang ang tukmang silot, gikan multa hantud sa pagkapriso, sa mga institusyon, mga lending companies ug mga indibidwal nga masakpan nga modawat og 4Ps cash card, 4Ps ID ug 4Ps agreement papers.

Matud ni CAT Leader Moreno nga luoy kaayo ang mga 4Ps beneficiaries nga nagaprenda. Ig-on sa taas kaayong interes ang mga miyembro nga moabot 20-25%, compounded pa gyud.

Mosangpot usab sa pagkatangtang sa programa ang mga 4Ps members kung magmagahi bisan sa makadaghang pahimangmo kung mapamatud-ang nagahimo sa ingon. Duna nay pipila nga na-spotcheck nga nagaprenda diin nahatagan na sa unang pahimangno ug nasayran na pud ang pangalan sa mga loansharks nga nasikop.

Kining mga ordinansaha pinasahe lamang sa dakbayan sa Tagum ug nahimong posible tungod sa namugnang Tagum City Convergence Advisory Council nga maoy nagatutok sa pagpanday og mga balaudnon sa pag-atiman sa 4Ps beneficiaries.

Dili pa lamang dugay, dunay 80 ka mga pamilya sa lungsod ang nakalampos sa 4Ps ug gidawat sa lokal nga panggamhanan aron sa lain na pong matang sa serbisyo nga ilang gikinahanglan.