Laing mga proyekto na usab ang laoman sa Davao del Norte human sa nahitabong diskusyon tali ni Kuya Gov. Edwin I. Jubahib ug General Manager Marcelino P. Escalada, Jr. sa National Housing Authority (NHA), kagahapon, Mayo 19, didto sa Tahanan ng Punong Lalawigan, Provincial Capitol Complex, Mankilam, Dakbayan sa Tagum.

Gawas sa mga pabalay, gisugyot ni Kuya Gov ang pagbaton ug Livelihood Centers sa mga importanteng dagsaan sa mga produkto nga gikan sa mga benepisyaryo sa DavNor KAAGAPAY aron mas dali ang pagbaligya niini sa mga konsumante ug interesadong mga tigpamalit (buyer). Gilakip sab ni Kuya Gov ang pagbaton ug mga Indigenous People’s dormitories alang sa mga magtutungha sa kolehiyo aron mas dali sila maka-adjust sa kinabuhi nga layo sa ilang gidak-ang komunidad.

Kahinumduman nga ang NHA ang naghatag ug ginatos nga mga balay alang sa mga IPs sa Davao del Norte isip pagtuman sa mandato sa maong ahensya nga matagaan ug disenteng pamuyo ang mga pamilyang Pilipino.

Gidayeg sab ni GM Escalada ang dakong suporta sa Davao del Norte sa Balik Probinsya, Bagong Pag-asa Program kon BP2, diin ang probinysa ang usa sa mga napili alang sa pilot implementation sa maong programa. Ang BP2 adunay tumong sa pag-decongest sa kauluhang Maynila pinaagi sa pagtabang sa katawhan nga makauli sa ilang nagkadaiyang mga probinsya inubanan sa klase-klaseng suporta gikan sa nasyonal ug lokal nga panggamhanan.

Dugang pa ni GM Escalada, ang probinsya sa Davao del Norte ang usa sa adunay pinakahan-ay nga implementasyon sa BP2 hinungdan nga makalaom kini ug dugang pa nga mga programa ug pondo gikan sa mga ahensya sa nasyonal nga panggamhanan ilabi na ang gikan sa NHA.

Anaa usab sa maong tigom sila Provincial Administrator Engr. Josie Jean Rabanoz, NHA Regional Office XI Head Engr. Sonia Bulseco, ug mga personahe gikan sa probinsyal nga panggamhanan ug NHA.