DILI LANG kahibalo labot sa pagtanom og gulayon ug pagbuhi’g manok, itudlo sab sa KAwsa sa AGrikulturA ug PAngibuhian sa barangaY kun KAAGAPAY ang mga pagbansay (trainings) lakip na ang maalamong paagi sa paggasto sa kinitaan (financial literacy).
“Tudloan mo sa pag-handle sa inyong income. Padako nga padako ni kay kung maayo mo mo-alaga, pagsunod hatag mas daghan, mag-double na atoang distribution. . Unya naa atong TESDA mohatag og training sa atong tanang KAAGAPAY; maghimo og tocino, maghimo’g sinasa nga kawayan ug amakan, og daghan pa. . .collaboration ni sa atong mga national government agencies. Unya ang DOLE, ang atong TUPAD program,” pahayag ni Gobernador Edwin “Kuya Gob” Jubahib uban sa pag-ila sa kontribusyon sa mga nasyonal ahensya labina ang TESDA pinaagi ni Provincial Director Arlyn Bandong ug ang DOLE provincial office.
Gusto sa DavNor Gobernador nga pagdako sa kinitaan sa KAAGAPAY beneficiaries, ila kining gamiton sa pagpauswag pinaagi ba kaha og sari-sari store o mini-market diha ra pod sa ilahang barangay.
“Ang gusto nato sustainable program; mao na tudloan mo sa financial literacy, unsaon pag-handle sa kwarta. Kana nga paagi diha mo magsugod nga modako, hinay-hinay nga nagdugang, nagdugang ang inyohang income. Mopadayon sab ang atoang program,” pahayag ni Kuya Gob.
Ingong naggikan sa pobre nga pamilya, positibo ang panglantaw ni Kuya Gob para sa mga KAAGAPAY beneficiaries nga andam mosuporta kanila bisan sa dagko nga mga paningkamot alang sa food security program sa probinsya.
”Sunod natong panghatag sa manok kung kaluy-an ta karong tuiga, naa na pod pares nga kanding. Og ma-perfect nato ang manok ug kanding maningkamot na sab ta nga ang sunod baka na pod. Mao na ang atong target nga ang tibuok probinsya sa Davao del Norte mahimo siyang food-sufficient or food-security province. Suportahan ta mo. Dili lang nga hatag karon, pasagdan na mo, kundili monitoron mo pirme; bisitahan mo sa atong mga doctor (vet), mga KAAGAPAY staff, sa atong mga Barangay Extension Workers kuyog sa atong city government of Panabo” pasalig ni Gobernador Jubahib sa tanang KAAGAPAY beneficiaries didto sa Katipunan, Panabo City.
Uban sa suporta, mihangyo ang Gobernador nga dili magtinapolan.
“Ang pinaka-sekreto, pinaka-importante, kamo gyod ang
mahimong kugihan. Dapat ang tanang membro walay tapolan. Wala ta’y gustong magpabilin sa atong sitwasyon karon. Ang akong paningkamot, kuyog sa tanang local officials, kuyog sa atong national agencies, kuyog sa atong mga department heads sa Kapitolyo, nga mahatagan mo og additional income para hinay-hinay nga adunay kausaban ang inyong pamuyo. . ang kalamboan nga atong gipangandoy. . Mao na nga kung ang katawhan, kamo ug kaming tanan adunay pagsinabtanay, ang atong pagtinabangay, dali gyod nato makab-ot ang tinuod nga kalamboan,” pagdasig ni Kuya Gob.
Gawas sa pagbuhi og manok, naghatag sab ang KAAGAPAY og tilapia fingerlings.
