Wala pa mitugpa ang bagyo sa probinsya, nakaalerto na baynte-kwatro (24) oras ang Provincial Disaster Risk Reduction Management Council sa Davao del Norte aron sa pagtutok sa dagan sa panahon ug sa pagresponde sa posibleng epekto niini.
Tungod sa state-of-the-art na multi-hazard early warning equipment ug pasilidad sama sa mga naka-istalar nga long range flood monitoring cameras ug emergency mass warning sirens kanunay ang pagmonitor sa lebel sa tubig sa dam ug kasapaan hinungdan sa mas sayo nga pahibalo ug pag-abiso sa publiko alang sa tukmang aksyon.
Nakatutok ang walo ka mga long range flood monitoring camera 24/7 sa mga kasapaan ug katubigan nga nakaplastar sa nagkalain-laing dapit sa lalawigan: Saug Dam, Brgy. Sagayen, Asuncion; Liboganon Dam, Brgy. Katipunan, Kapalong; Pagsabangan Bridge, Tagum City; Saug-Liboganon Junction, Tagum City; Magupising Bridge, B.E. Dujali; Menzi Bridge, Sto. Tomas; Kasilak Bridge, Panabo City; ug Guadalupe National Highway, Carmen.
Sa kasamtangan, dunay unom (6) ka mga emergency mass warning sirens ang PDRRMC nga nahimutang sa mga komunidad nga kasagarang maigo sa baha. Ang pagpabulhot sa siren nabahin sa tulo ka lebel depende sa gitas-on sa tubig sa kasapaan. Sa unang pag-alerto, sa dili pa patingogon ang alarm sulod sa lima (5) ka minuto, tawagan sa naka-duty nga personahe ang lungsod aron sa pagpahibalo sa delikadong pagsaka sa tubig; dayon, kung padayon ang pagtubo, ipalanog ang ikaduhang alarm nga molungtad og napulo (10) ka minuto diin paandamon ang katawhan sa posibleng pagbakwit; ug sa katapusan, sa ikatulong alarm, ipalanog ang siren sa way undang nga nagpasabot nga adunay mahitabong pagbaha ug mandoan ang katawhan sa pagbakwit ngadto sa luwas nga lugar.
“We have a state-of-the-art weather and flood monitoring equipment with technical people manning on it because we believe that timely early warning information can save lives. Also, our strike teams on-standby are capable of handling different types of emergencies. Above all, our operation center is operating 24/7,” pagsaysay ni Eric R. Rosillo, MCDRM, Local DRRM Officer II, DDN.
Dugang ni Rosillo nga gina-activate gilayon ang PDRRMC Operation Center sa panahon nga dunay mosuloray nga bagyo, hulga sa baha ug grabeng pag-ulan. Gipasalig usab niya nga naka-standby kanunay ang mga responders ug rescue assets sama sa rubber boats ug uban pang floating equipments aron moresponde sa mga nabahaan.
Kahinumdoman sa milabay’ng bagyo nga mihapak sa probinsya, ang Tropical Storm Crising, daling nakapagawas ug abiso ang probinsyal nga kagamhanan aron isuspende ang mga trabaho ug klase sa tibuok lalawigan. Tungod kana sa abtik nga aksyon ug tambag gikan sa nasangpit nga buhatan. Regular ang paghatag sa mga updates sa bagyo nga nakapost sa ilang official facebook page ug nakasibya sa radyo ug telebisyon.
Base sa ilang report, walay natalang naangol o naguba nga mga gambalay niadtong tungora gawas sa gamay’ng pagsaka sa tubig sa Liboganon Dam ug duha ka barangay sa New Corella nga nakasinati’g kusog nga pag-ulan.
