16 ka mga kanhing rebelde kon Former Rebels nga unang batch usab nga nakagradweyt sa de-radicalization program sa Davao del Norte diha sa Balay Panaghiusa ug 20 ka mga FRs gikan sa probinsya sa Bukidnon ang nakadawat sa reintegration financial assistance gikan sa Department of Interior and Local Government (DILG) ilawom sa programang Enhanced - Comprehensive Local Integration Program (E-CLIP) niadtong Miyerkules, Mayo 26.
Managlahi ang nadawat nga kantidad sumala sa ilang status: ang Regular members nakadawat og P65 mil diin gilangkoban kini sa P50 mil nga livelihood assistance ug P15 mil immediate assistance; samtang ang mga Militia ng Bayan (MB) midawat og P15 mil. Mikabat P2,040,000 ang napagawas nga salapi niadtong tungora nga gipahigayon sa Balay Panaghiusa, Doña Andrea, Asuncion, Davao del Norte.
Sumala ni Provincial Social Welfare and Development Officer Rosalinda Rapista, nga mao na ni ang ikaduhang higayon nga dunay taga-laing probinsya ang nakig-ambit sa mga patigayon sa probinsya nga may kalambigitan sa pag-atiman sa mga FRs. Pagsubay niya nga andam si Gobernador Edwin “Kuya Gob” Jubahib nga modawat sa bisan kinsa nga modangop kaniya bisan kung dili iyang ginsakopan.
Human ma-encash sa bangko ang nadawat nga tseke sa mga FRs, mobalik gilayon sila sa ilang mga lungsod ngadto sa mga receiving units nga kasagaran ang Philippine Army kauban ang LGUs.
Gibutyag ni DILG Assistant Provincial Director Jeannette Palmera nga dili maundang ang paghatag serbisyo sa mga kanhing rebelde bisan pa man nakahuman na kini sa rehabilitation program. Mintras duna pay gobyerno, ang paglantaw sa katawhan dili pud maundang.
“Mao nay isa sa dako kaayo pud nga responsibilidad sa atoang mga receiving units ug sa atoang mga local government units (LGU)… Pagbalik nila sa komunidad, imonitor gyud gihapon sila. Kumusta na ang ilang panginabuhi. Nakaeskwela ba ang ilahang mga anak? Or sila mismo unsa ilahang kahimtang? So kana karon mao na pud nay responsibilidad sa LGU kung asa sila unya mo-reintegrate isip usa ka miyembro sa atoang komunidad,” pagsubay ni Palmera.
Kahinumdoman nga una nang nadawat sa mga 16 nga nakagradweyt nga residente sa Balay Panaghiusa ang P6 mil gikan sa DOLE-TUPAD ug P10 mil gikan kang Gobernador Jubahib niadtong buwan sa Abril. Nagpasalig ang DSWD nga ilang ihatud sa mga tagsa-tagsa ka panimalay sa benepisyaryo ang dugang P20 mil nga Livelihood Settlement Grant dungan sa ilang pagmonitor sa ilang kahimtang.
Duna nay nakalinya nga 100 kapin nga mga FRs alang sa ikaduhang batch sa programa ang naghulat nga ma-reclassify sa dili pa isulod sa Balay Panaghiusa. Pasalig ni Kuya Gob nga andam kanunay ang iyang opisina sa pag-welcome sa gustong mosurender nga mga armadong grupo kay buot niyang makab-ot na sa probinsya ang tinud-anay nga kalinaw ug tunhay nga kalamboan.
“Mao nay hinungdan nganong wa ko mobalibad nga monaog mo. Kay kung mahimong peaceful ang Bukidnon pinaagi sa inyong pagsurender, kung mahimong peaceful ang Davao de Oro, ang Agusan, mahimo usab nga peaceful ang Davao del Norte ug mahimong peaceful ang tibuok Mindanao nga ato ng gipangandoy nga wala nay gubot,” pagpadayag sa gobernador.
