NAKATABANG gyod og dako ang nadawat nga payout sa mga benepisyaryo sa KAwsa sa AGrikulturA ug PAnginabuhian sa barangay kun KAAGAPAY Associations sa barangays Mambing, Suawon ug Carcor, New Corella.
Tungod sa maayong tumong sa KAAGAPAY ingong food-security program ni Gobernador Edwin “Kuya Gob” Jubahib sa Davao del Norte, wala magmakuli ang Department of Labor and Employment (DOLE) pinaagi sa ilang programang Tulong Panghanapbuhay sa Ating Disadvantaged/Displaced Workers (TUPAD) program nga motabang pinaagi sa pag-pondo makaduha na ka higayon sobra P15 milyones pesos.
Matod ni Marcelo Diolagon nga membro sa Purok 2 Mambing, New Corella KAAGAPAY Farmers Association nga pang-palit niya og bugas ang nadawat nga P3,960.
“Akong nalantaw nga makatabang sa among kapobrehon kay karon ganing adlawa payout dire sa among barangay. Naa na ko’y nadawat. Wala gyod ko magdahom kay abi namo nga sa magdako na among manok diha nami magka-income. Salamat kaayo kang Kuya Gob kay kining programaha nga gipasiugda sa atong gobyerno. Maayo kaayo ni kay pagsugod lang daan aduna nami ikapalit og bugas. Palitan ko ni’g isa ka sakong bugas, grocery para sa akong pamilya. . Daghan kaayong salamat Gob sa imong dakong pagtabang sa among kapobrehon dire sa Mambing. Tenk yu kaayo,’ todo-pasalamat ni Marcelo.
Alang kang Mario Lusorata, Sr. nga membro sa Purok Kasilak, New Cortez, New Corella KAAGAPAY Association, wala gyod sila mahibalo nga sa ilang paghimo’g kulongan sa manok bayaran sila og tig P396 ang adlaw sa napulo ka adlaw
“Makatabang ni sa among panginabuhian sa bukid. . Wala ko mahibalo niini, 3,960. . Gamiton para mabuhi pod akong pamilya. Usa ana bugas jud. . Dako kaayo ko’g kalipay kang Kuya Edwin Jubahib tungod sa iyang panglantaw sa mga kabus nga anaa sa kabukiran,” matod ni Mario Lusorata, Sr.
Alang kang Crisanta Jorgio sa Purok 5 New Cortez, New Corella KAAGAPAY Farmers Association:
“Karon na lang bag-o pa. . nalipay kay nakatabang namo. . makatabang namo sa among pagpuyo, sa among kinahanglanon. Palit pod namo ni’g mga konsumo. . Magpasalamat ko ni Gob nga dako kaayo ni’g tabang namong mga farmers.”
Gawas kanila, sila Millan Balong ug Elvie Paña Parojinog sa Purok 7 Mambing, New Corella KAAGAPAY Farmers Assn; Romelyn Evangelista Capuyan sa Purok 2 Mambing, New Corella KAAGAPAY Farmers Assn; Abraham Calibaran sa Kasilak, New Cortez KAAGAPAY Farmers Assn ug daghan pa mapasalamaton kaayo sa nadawat nga kaayohan gikan sa TUPAD-KAAGAPAY.
Gawas sa nadawat nga suhol gikan sa TUPAD tudloan sab ang mga KAAGAPAY benepisyaryo pagdumala sa ilang kita (financial literacy) samtang ang Technical Skills Development Authority (TESDA) mohatag og daghang mga pagbansay gawas sa ubang nasyonal ahensya nga andam sab motabang.
