Nailhan na og sugod sa America ang nindot nga Musa Fabric gikan sa Davao del Norte, pinaagi sa tiglaraw nga sinina nga gidesenyo ni Carl Andrada, usa ka US-based Pinoy fashion designer.

Nakadayeg si Andrada sa ka kanindot, katahum ug kalidad sa tela sa Musa nga iyang gihinganla’g “world-class”, ug matud niya angay ipasigarbo sa tibuok kalibutan.

Gani, bag-ohay pa lamang iyang gipagamit ang pipila sa iyang uang mga obra maestrang senina nga gama sa Musa Fabric sa photoshoot ni Ms. Universe 2020 contestant, Ms. Mauritius.

Isip pagduso sa MUSA, nagplano si Andrada sa paghimo’g 15 ngadto sa 20 ka desenyo, nga iyang i-pasundayag kaparte sa SS2022 LA Fashion Week karong bulan sa Oktobre, aron pormal nga ipaila sa US ang maong tela sa MUSA.

Suportado sab sa US designer ang Musa Advocacy Project, nga gipasiugda ni home-grown designer Gleizl Joy Soo, aron tabangan ang panginabuhi sa mga priso, kababanyen-ang IPs ug Muslim, ug mga mag-uuma, pinaagi sa paghablon sa tela gikan sa saging.

"I feel that in my own little way, I could open doors of opportunities for Musa and the people behind it (Bisan sa pamaagi nga gamay, makatabang ko sa pag-abli’g oportunidad alang sa Musa ug sa mga tawo’ng nagpaluyo niini),”sulti ni Andrada.

https://www.sunstar.com.ph/article/1896185...